ስርዓት ህግደፍ፣ ሕቡራት ኢማራት ዓረብ ኣብ ዓሰብ ንመዓላ ወተሃደራዊ መደበር ዝውዕል ናይ 30 ዓመት ክራይ ረኺባ ከምዘላ ብምጥቃስ ሓደ “Maydania” ዝተባህለ ኣብ በይሩት ዝመደበሩ ናይ ዓረብ መደበር ቴለቭዥን ንዘቕረቦ ዜና ኣሉታ ንምሃብ ግዜጣዊ መግለጺ ኣውጺኡ።

ኢማራት ዓረብ ኣብ ዓሰብ ወተሃደራዊ መዓስከር ትሃንጽ ከምዘላ ብፍሉጣት ኣህጉራውያን ማዕከናት ዜናን ናይ ውድብ ሕቡራት ሃገራት ተኸታታሊ ጉጅለን ብተደጋጋሚ ክዝረበሉ ጸኒሑ ክንሱ፣ ሚኒስትሪ ጉዳያት ወጻኢ ናይቲ ስርዓት ኣብ ሕጂ በጺሑ ነቲ በዛ ብተዛማዲ ሰፊሕ ተፈላጥነት ዘይብሉ መደበር ቴለቭዥን ዓረብ ዝተዋህበ ዜና መግለጺ ብምውጻእ መሰረት ዘይብሉ ወረ ምዃኑ ከነኣእሶ ምፍታኑ ኳ ብልሓቱ ንጹር ኣይኮነን።

ኣብ ፈለማ ወርሒ ሕዳር ኣገልግሎት ዜና ሮይተርስ፣ ጉጅለ ተኸታተልቲ እገዳ ውድብ ሕቡራት ሃገራት ኣብ ዓመታዊ ጸብጻቡ፣ “ ስዑዲ ዓረብን ኢማራትን ከም ኣካል ናይቲ ብስዑዲ ዓረብ ዝምራሕ ንተቓወምቲ ሕቱ ንምጥቃዕ ዝዓለመ ኪዳን ኣብ ኤርትራ ወተሃደራዊ ህላወ መስሪተን ከምዘለዋ ብምጥቃስ፣ ብሓገዝ ወጻኢ ሓድሽ ወተሃደራዊ መዓስከርን ወደብን ምድኳን፣ ኣብ ልዕሊ እቲ ስርዓት ተበይኑ ንዘሎ እገዳ ዝጥሕስ ክኸውን ከምዝኽእል ከምዝገለጸ ሓቢሩ እዩ።

ኣብዚ ቅንያት ‘ዚ ‘ውን ጀይንስ janes. ከምኡ ‘ውን ስትራትፎር ዝተባህለ ኣብ ኣህጉራዊ  ወተሃደራዊ ምዕባሌታት ዝግደሱ ፍሉጣት ናይ መጽናዕቲ ትካላት ‘ውን ብ ናይ ሳተላይት ምስልታት ብምስናይ ህላወ ዝተራቐቓ ነፈርቲ ኣብ ዓሰብን ህንጸት ሓዱሽ ወተሃደራዊ መዓስከርን ኣብ ባይታ ይካየድ ከምዘሎ ሓቢሮም እዮም።