14 ሕዳር 2015

ስርዓት ህግደፍ ብዘይተጸንዐን ብዘይ እኹል መሰናድኦን ከምኡ’ውን ኣብ መነባብሮ ህዝቢ ከስዕቦ ዝኽእል ስነ-ኣእምሮኣውን ቁጠባውን ቅልውላው ዕሽሽ ብምባልን ዝኣወጆ መስርሕ ምቅያር ባጤራ ናቕፋ፡ እቲ ካብ ኢዱ ናብ ኣፉ ዝነብር ዝበዝሐ ህዝብና ብስእነት ባጤራን ሕጽረት ሃለኽትን ተወሳኺ ኣደራዕ ረኺቡ ከምዘሎ ኣብ ዝሓለፈ እዋናት ተገሊጹ ነይሩ።

ይኹን እምበር፡ ኣብ መስርሕ ምቅያር ባጤራ ናቅፋ፡ እቲ በተኽ ኤርትራዊ ጥራይ ኣይኮነን ጸጊምዎ ዘሎ። ኣብ መንጎ ስርዓት ህግደፍን ሰበስልጣን ዞባ ከሰላን፡ ከምኡ’ውን ቁጠባዊ ትካላት ህግደፍ፡ ላዕለዎት ኣዘዝቲ ሰራዊት፡ ሓለዋ ስግረዶ ዶብን ጸጥታን ህግደፍን ገለ ምስ ህግደፍ ረብሓ ዘለዎም ነጋዶን’ውን እቲ ብስርቅን ጉቦን ደሊቦሞ ዝጸንሑ ሚልዮናት ኣረጊት ባጤራ ናቅፋ ምጉሓፉ ሓርቢትዎም ከምዘሎ እቶም ምንጭታት ሓቢሮም።

እቲ ዝዓበየ ጸገም ግን፡ ሰበስልጣን ከሰላ ምስ መሻርኽቶም ወከልቲ ህግደፍ ዘይሕጋዊ ንብረትን ሰባትን ኣብ ምስግጋርን ኩሊት ኤርትራውያን ብምሻጥን ኣብ ከሰላ ዝተኸዘነ ባጤራ ናቅፋ፡ ስርዓት ህግደፍ ኣብ ምቅያር ሓድሽ ባጤራ ናቅፋ ምዕጥይጣይ ስለዘርኣየ፡ ሰበስልጣን ዞባ ከሰላ ጁባታቶም ዝመልእሉ ሓድሽ ባጤራ ናቅፋ ስለዝጎደሎም ዶባቶም ከምዝዓጽውዎን ኣብ ከሰላ ኣብ ዘይጋዊ ንግዲ ዝተዋፈሩ ስለያዊ ንጥፈታት ዘካይዱ ወከልቲ ህግደፍ ከምዝሰጉን  ንህግደፍ ብትሪ ምስገለጹ፡ ስርዓት ኢሳያስ እቲ ጉዳይ ከይላባዕ ብምስጋእ ንሰበስልጣን ከሰላ ብምስጢር ናብ ኣስመራ ብምዕዳም፡ “ኩሉ ጠለብኩም ብዘይዏል ሕደር ከነማልኣልኩም ኢና’’ ብምባልን መተዓሻሸዊ እንግዶት ብምግባርን ነቲ ወጥሪ ከህድኦ ከምዝፈተነ እቶም ምንጭታት ገሊጾም። ላዕለዎት ሓለፍቲ ጸጥታን ሰራዊትን ህግደፍ፡ ከምኡ’ውን ምስ’ቲ ስርዓት ጥቡቕ ዕርክነት ዘለዎም ነጋዶ’ውን ንዓመታት ብጉቦን ብስርቅን ክእክብዎ ዝጸንሑ ዓሰርተታት ሚልዮን ኣረጊት ባጤራ ናቅፋ ኣብ ኤርትራ ኣብ ዝተወሰነሎም ገደብ ግዜ ንምቅያር ስለዝጸገሞም፡ ምስ ሰበስልጣን ከሰላ ተሰማሚዕምን ጉቦ ከፊሎምን ኣብ ከሰላ ብሕቡእ ይቅይርዎ ከምዘለው ተፈሊጡ።

ከምዝፍለጥ፡ ስርዓት ህግደፍ ዘይሕጋዊ ንብረት ካብን ናብን ዘሰጋግረላ፡ ካብ ማእሰርቲ፡ ጥሜትን ግዱድ ሃገራዊ ኣገልግሎትን ብምምላጥ ካብ ኤርትራ ክሃድሙ ዝፍትኑ ዜጋታት ዝጨውየላን ዝቀትለላን ብመሬት ትዋሰቦን ዝምድና ዝይበተኸትን ሃገር ሱዳን ጥራይ’ያ።