ዝኸበርኩም ኣሕዋትናን ኣሓትናን፦ ኣብ ዝሓለፈ ጽሑፍና፡ ከምኡውን ኣብቲ ኣብ ከተማ ሎንዶን ዝጸዋዕናዮ ሕዝባዊ ኣኼባ  ከም ዝገለጽናዮ፥ ኣብ ዝተፈላለያ ከተማታት ዓባይ ብሪጣንያ ብሕዝቢ ዝተመርጻ ኮሚቴታት ሓድነት ኤርትራውያን ቆይመን ኣለዋ። ኣባላት ናይዘን ሓደስቲ ኮሚቴታት ክንላለን ክንጠናኸርን መዲብና ምንባርና ትዝክሩዎ ትኾኑ። ኣባላት ናይዘን ኮሚቴታት ነንሕድሕዶም ስለዘይፋለጡ፥ ኣብ ሞንጎኦም ድልዱል ርክባትን ስጡም ኣካይዳን መታን ክህሉ፥ ብዝተፈላልየ መገድታት ክንራአኽብ ጸኒሕና ኢና። ፈለማ ብዘተ `ፓልቶክ` ኢና ጀሚርና። ብዕለት 18 ታሕሳስ 2016 ድማ ኣብ ከተማ ኮቨንትሪ ብኣካል ተራኺብና ተዛቲና ኢና። ኣብ ኮቨንትሪ ዝርከቡ ኣባላት ኮሚቴ ሓድነት፡ ብተገዳስነት ነቲ ኣኼባ ስለ ዘሳለጡልና ብፍሉይ ምስጋና ነቕርበሎም።

ኣብቲ ዘካየድናዮ ኣኼባ ዝተፈላለየ ዛዕባታት ኣልዒልና ልዙብ ዘተ ኣካዪድና፥ ኣብ ሠናይ ምርድዳእ እውን በጺሕና። ከምቲ ደጋጊምና ዝገልጽናዮ፥ እቲ ቀዳማይ ዕማም ኮሚቴ ሓድነት ኤርትራውያን ንፍትሒ፥ ብደረጃ ዓባይ ብሪጣንያ፡ ሓደ ዓብዪን ድልዱልን ኮሚቴ ክነቕውም እሞ ዝተፈላለየ ንሕዝብና ዝጠቅም ዕማማት ድማ ከሳልጠልና ኢዩ። በዚ መሠረት፥ ኣብ ከተማ ኮቨንትሪ ተኣኪብና ተዛቲና ከም ዝተሰማማዕናዮ፥ ኣብ ዝመጽእ 2-3 ወርሒ ብደረጃ ዓባይ ብሪጣንያ ኮሚቴ ክነቐውም ኢና። እቲ ብደረጃ ሃገር ብሪጣንያ ዝቐውም ኮሚቴ፥ ብኹልንተናኡ ሕዝባዊ ኮይኑ፥ ብግሉጽን ብሕጋዊ ኣገባብን እናሠርሔ፥ ዝተፈላለዩ ዕማማት ኬሳልጥ ከምዝኾነ ኣስፊሕና ተማኺርናሉ፡ ኩላትና ድማ ዓጊብናሉ ኢና።  እቲ ብደረጃ ዓባይ ብሪጣንያ እነቑሞ ኮሚቴ፡ እንመርጸሉን እንምርቐሉን ሥፍራ ከኣ፡ ኣብ ከተማ ሎንዶን ክኸውን ተሰማምዕና። ኣደራሽ ምስ ሓዝና፡ ኣኼባ ዝግበረሉ ዕለት ወሲንና፡ ንሕዝቢ ክነፍልጥ ኢና።

ተሳተፍቲ ካብ ከተማታት ማንቸስተር፡ ካርዲፍ፡ ሊድስ፡ ሌስተርን ኮቨንትርን ዝተወከሉ ኣባላት ኮሚቴታት ሓድነት ኢዮም ነይሮም። ዛጊት ዝፈጸምናዮም ዕማማትን፡ ዘጋጥሙና ዘለዉ ብድሆታትን፡ ንዝመጽእ ሰሪዕናዮም ዘለና መደባትን፣ ከምኡ`ውን ኣብ ልዕሊ ኤርትራውያን ኣሓትናን ኣሕዋትናን ዝወርድ ዘሎ ዜስካሕክሕ ግፍዕታትን ከቢድ ጸገማትን ብሰፊሑ ዘቲና። እቲ ብደረጃ ዓባይ ብሪጣንያ እነቑሞ ኮሚቴ፡ ስቅያት ኤርትራውያን ኣብ ምቅላል፥ ብኸመይ እጃሙ ኬበርክት ከምዝኽእል እውን  ተዛራሪብናሉ።

ኮሚቴ ሓድነት ኤርትራውያን ኣብ ሞንጎ ዜጋታት ኤርትራ ስኒትን፡ ምርድዳእን፡ ምክእኣልን፡ ፍቅርን ብምኹስኳስ፡ ኩላትና ኤርትራውያን ተሳኒና፡ ኣብ ኩሉ መዳያት ብምውሳእ፡ ጸገማት ኤርትራውያን ኣብ ምቅላል ኣበርቲዕና ክንሠርሕ ከምዝግባእ ተረዳዲእና። ኮሚቴ ሓድነት ሒዙዎ ዘሎ ዕማም፡ ንካልኦት ኣብ ሕብረተሰብና ዝሠርሑ ዘለዉ ኣካላት ክሃስዮም ከምዘይክእል፡ እኳደኣ በንጻሩ፡ ባይታ ኬጣጥሓሎምን ክድግፎን ከምዝኾነ ተዛሪባናሉን ዓጊብናሉን ኢና። እዚ ንሕና ሒዝናዮ ዘለና ሕዝባዊ ዕማም ንዝኾነ ይኹን ሓልዮት ሕዝቡ ዝስምዖ ዜጋ ኬፍርሖ ከምዘይግባእ ኣስሚርናሉ። ብተወሳኺ ድማ፥ ነፍሲ ወከፍ ኤርትራዊ ዜጋ፥ ቃንዛ ኣሓትናን ኣሕዋትናን ተሰሚዑዎ፡ በብዓቕሙ፡ እወንታዊ እጃሙ ንኸበርክት፥ ኣብ ዘዘለዎ ተሓባቢሩ ክሠርሕ ከምዝግባእን ጻዊዕትና ንቕርብ፥ ንሕና ዓቕምና ብዝፈቕዶ መጠን ክንሠርሓሉ ኢና። ፋሕፋሕ ኢልካን እንዳ ተተፋነንካን ዝግበር ምንቅስቓሳት፡ ብፍላጥ ወይ ብዘይፍላጥ ንሕዝቢ ኤርትራ ዝሃሲ ስለዝኾነ ኩሉ ኤርትራዊ፥ ናብ ሓድነት ሕዝብናን፡ ማዕርነት ሕብረተሰብናን፡ ግዝኣተ ሕግን ክሠርሕ፡ መሰል ውልቀ ዜጋታትን ንክኽበር ክጽዕር ዜግነታዊን ሰብኣዊን ሓላፍነት ኣለዎ ንብል።

ነቶም ብመራኸቢ ብዙኃን ዝዋስኡ ደቂ ሃገርና ዝገብሩዎ ዘለዉ ሥራሓት ኣሞጒስና፥ ብዝከኣሎም መጠን ንሕብረተሰብና ኣብ ምትሕብባርን ምትሕቚቛፍን ዝያዳ ዕዙዝ እጃሞም ኬበርክቱ ድማ ብትሕትና ንምሕጸን። ንኣብነት፥ ናይ ዕርቂን ናይ ሕንጸትን ሓሳባት እናዘርግሑ፥ ነቲ ክፈላሊን ኬባእስን ዝኽእል ጽሑፋትን ሓሳባትን ግን እንተ ኣወገዱዎ ጽቡቕ ኢዩ ንብል።

ነዚ ብደረጃ ዓባይ ብሪጣንያ ክነቑሞ እንሸባሸበሉ ዘለና ኣካል፡ ኩልኻትኩም ደቂ ሃገርና በብዓቕምኹም ክትሕግዙና ብትሕትና ንሓትት። ኣብ ልዕሊ ሕዝብና ዝወርድ ዘሎ ስቓይን ብርሰትን፥ ኩላትና ኤርትራውያን ሓቢርና እንተሠሪሕና ጥራሕ ኢዩ ዝቃለል።

በዚ ኣጋጣሚዚ፥ ንኩልኻትኩም ክርስትያን ኣሕዋትና ልዑል ፈጣሪ፡ ርሑስ በዓል ልደት ይግበረልኩም። ንኹላትና ድማ፡ ዓመት 2017 ዓ.ም.ፈ. ዓመት ሓድነትን ዓመት ሰላምን ራህዋን ክትኮነልና፡ ንምነ፡ ክንጽዕር ድማ ኢና።

ሕቶ ኮነ ርኢቶ እንተለኩም፡ በዚ ስዕብ ርኸቡና፥

• Email: haddnet@haddnet.org
• Web: www.haddnet.org
• Facebook: haddnet Ertrawyan

ኮሚቴ ሓድነት ኤርትራውያን ንፍትሒ ዓባይ ብሪጣንያ