ተወሳኺ ስግኣት

ብ ኣወልኼር ዓ/ሓፊዝ

ኣብ ሃገሮም ካብ ዘሎ ጥምየት፡ቅልውላው፡ ዘይምቅሳን፡ኣድልዎ፡ ግፍዒ …………. ንምህዳም ነተን ብዓይነተን ዘይብቁዓት፤ ብሕግን ሰነ-ፍልጠትን ዘይምራሓ መራኽብ ተወጢሕካ ንኣውሮጳ ገጽካ ምጉዓዝ ናይ ቅብጸት ጉዕዞ ኣብ ርእሲ ምዃኑ፤ እቶም ተሳፈርቲ ካብ ክሳብ ክንደይ ኣሰቃቂ ዝኾነ ናብራ ይሃድሙ ከም ዘለዉ ዘርኢ እዩ።

እታ ብቁጽሪ ህዝባ ምስተን ዝነኣሳ ሃገራት እትቁጸር ኤርትራ እቶም ዝበዝሑ ተወጣሕቲ መራኽብ ሞት ዜጋታታ ምዃኖም ሓደ ካብቲ ሕንቅል ሕንቅልተይ`ዩ።

ሃገራት ምዕራብ እዚ ተርእዮ`ዚ ብዝተፈላለየ ምኽንያታቱ ከምዘገድሶም ርእዮም`ሲ ብዛዕብኡ ንምዝታይ ይራኸቡን  ይመኻኸሩን ኣለዉ፤ ነቲ ድሮ ዝተቀላቀለ ንፍታሕ ዝበልዎ እማመ ኸኣ ገለ ክሰማምዑሉ ገለ`ውን ዘይተቀበልዎ ከም ዘለዉ ተፈሊጡ`ዩ።

ኣብቲ ዝደሓረ ኣኼበኦም ዝተረኽበ ናይ ውድብ ውዕል ሰሜን ኣትላንታ NATO በዓል ስልጣን ” እዘን መራኽብ ሙጃሂድን ጸይረን ከይመጻ” ዘለዎ ስካፌ ምግላጹ ንጉዳይ ተወጣሕቲ መራኽብ ሞት ዝከታተል ሰብ ዘሰክፍ`ዩ።

እዚ ከምዚ ዝዓይነቱ ስያሜታት ሒዙ ዝመጽእ “ጸጥታዊ ስግኣታት” ናይ ድላይካ ግበር ሓምላይ መብራህቲ ስለ ዝኾነ ጽባሕ  “ሙጃሂድን ዝጸረት መርከብ” ተባሂላ ተወቂዓ ናይ ትሰጥም መርከብ ወሬ ከይንሰምዕ ዘስግእ`ዩ።

ንሕምቀትና ንዘይብቅዓትና ነጋሪ ኣይንደልየሉን ኢና።እዚ ዝስደድ ዘሎ ፤ ሰብኣዊ ክብሩ ዝድፈር ዘሎ፤ ማሕበራዊ ጸጥታ ሓርቢትዎ ካብ ስድራን ከባብን ሪሒቁ ብሂወቱ ዝቋመር ዘሎ ህዝቢ ኣብ ምፍጣር ጸገማቱ ተራ ኣይነበሮን ማለት ኣይኮነን።

ግና እቲ ደምን ረሃጽን ከፊሉ ርግኣት ዘጥረየ፤ ብዝምድናዊ ኣዘራርባ ሰብኣዊ ክብሩ ክሕሉ ዝኸኣለ፤ ርእይትኡን ትዕዝብታቱን ዘመሓላልፈሉ መስኖታት ዝወገነ ህዝቢ ምዕራብ ጸገማት ተወጣሕቲ መራኽብ ሞት ብልክዕ ክበጽሖ እንተኺኢሉ ዝጻወቶ ተራ ከምዝህሉ ፍሉጥ`ዩ።

መንግስታት ምዕራብ ንዘለዎም ቁጠባዊ፡ ፖለቲካዊ፡ ዜናዊ፡ ወተሃደራዊ፡ ድፕሎማስያዊ ሓይሊ ተጠቂሞም እንተስ ንበይኖም እንተስ ምስ ህዝቢ ናይተን ስደተኛታት ዘፍርያ ሃገራት ኮይኖም ነተን መንግስታትን መራሕተንን ክገንሑ ከፈራርሑ መንገዲ ከርእዩ ኮታ ነዚ ጠገለ ሲኢኑ ዘሎ ሰደት ደቂ ሰብ ደው ከብልዎ ይኽእሉ`ዮም።

ነዚ ዘየፈጽም ሕሳባት ምስ ዝህልዎም ከኣ ብመንጽር ናይቲ ሕሳባት ንውጺኢታቱ ብኣወንታ ክቅበሉ ኣለዎም።

AAHafiz (186 )22/05/15

\\