ምልካዊ ስርዓት ኢሳይያስ፡ ከም መተካእታ ናይቲ ኣብ ማሕዩር ስርዓት ህግደፍ ተዳጕኑ ዘሎ ኣመሓዳሪ ዞባ ደቡብ ነበር ኣቶ ምስጦፋ ኑርሕሸን፡ ንኣማሓዳሪት ከተማ ማጽዕ ነበር ፋና ተስፋማርያም፡ ከም ዝመዘዛ ብጎቦ ጎቦ እቲ ስርዓት ኣረጋጊጹዎ።

ኣብ ዝሓለፈ ሰሙን ኣብ ዜና ኣሰና ኣቐዲምና ኢሳይያስ ኣማሓዳሪት ዞባት ክትከውን ሓጽዩዋ ከምዘሎ ኣብ ዝጠቐስናሉ ኣጋጣሚ ከምዝኣመትናዮ፡ ኢሳይያስ ንፋና ተስፋማርያም ብዓቕማን ናይ ምምሕዳር ተመክቶኣን ዘይኮነ፡ ብተኣማንነታ ንተማእዛዝነት ስልጣኑ እዩ መሪጹዋ።

ምልካዊ ስርዓት ኢሳይያስ፡ ብኣኼባ ኣምሲሉ ብጎቦጎቦ ንፋና ኣማሓዳሪት ዞባ ደቡብ ምሻሙ ሓዱሽ ባህሪ ናይቲ ስርዓት ኳ እንተዘይኮነ፡ ንሓያለ ዓመታት ኣመሓዳሪ ዞባ ንዝነበረ ምስጦፋ ኑርሕሸን ኣበይ ከምዘእተዎ ንህዝቢ ከይሓበረ ከምዚ ዝኣመሰለ ስጉምቲ ምውሳዱ ግን፡ ኣብ ልዕሊ ህዝቢ ዘለዎ ክቱር ንዕቀት ዘርኢ እዩ።

ናይ መባእታ ደረጃ ትምህርቲ ጥራይ ዘለዋ ፋና ተስፋማርያም፡ ኣብ ግዜ ገድሊ ኣብ ብርጌድ 31 ኮምሽነር ጋንታ በጺሓ ዝነበረት ኮይና፡ ብድሕሪኡ ኣብ ክፍሊ ህዝቢ፡ 06 ኣብ ዝብሃል ኣሃዱ ትሰርሕ ነይራ። ቀጺላ ኣብ 72 (ስለያ) ክትሰርሕ ኳ እንተጀመረት ብቕዓት ስለዘይነበራ ናብ ማሕበር ደቂ ኣንስትዮ (ሃማድኤ) ተመዲባ። ኣማሓዳሪት ከተማ ባጽዕ ቅድሚ ምዃና፡ ኣማሃዳሪት ዞባ ዕዳጋ ሓሙስን ከባቢ ዩኒቨሲቲን ዝነበረት እያ።