ሬሳ ደቅና’ ኳ ተራሓቀ ቀታሊ ደቅና ግን መን ምዃኑ ኣይጠፍኣናናን

ኣብዚ ዝሓለፈ ሒደት ማዓልታት፣ ንህልቂት ሓደጋ ላምፓዱሳ ብዝምልከት ኣሽመላሽ ኣብርሃ መግለጺ ጎይቶቱ ንምስማዕ ኣብ ቲቪ ኤረ ብምቅራብ፣ ንብዓት ሓርገጽ ክነብዕ ፈቲቱ። እቲ ዘገርም ዋሓጥዮ ተበልክዋ ትጎስሞ ከምዝባሃል፣ ኣብክንዲ ናይ መጻናንዒ ቃላት ምስማዕ፣ መስደመም መግለጺ ኣንቢቡ።

እዚ ብነዉሩ ዝሕበን ስርዓት፣ ካብ ሓሶን ናብ ምትላል፣ ካብ ምትላል ናብ ባጭ፣ ካብ ባጫ ናብ ሕጨጫ ክሰጋገር ጸኒሑ ኣሎ። ህዝቢ ኤርትራ ያኢ ትማሊ ዝተወልደ ህጻን ኮይኑስ፣ መን ከምዝበደሎ ጠፊእዎ መርቶዖታት ብምቅራብ ምስ ኣሜሬካ ክማጎቱ ድልዋት ምዃኖም ከይሓፈረ ኣስመላሽ ኣስሚዕና። ህዝቢ ኤርትራ ጸሊም ምዕራይ ስጳኛ ኮይኑ ስለዝተሰማዓኩም ዶ ይኸዉን ህግደፍ ከም ማታዶር (matador) ቀይሕ ጨርቂ ኣሪኢኹም ናብ ኣሜሪካ ቾፖ ትብልወ ዘለኹም፣ ወይ ምስ ዕዉርቲ መርዓት ኣዳራራስ ትጻወቱ ዘለኹም መሲልኩም ሕቆ ህዝቢ እንዳ ደሰቅኩም ንሕና ኣይኮናን ትብሉ ዘለኹም። እዚ ናይ ሕጂ ፍጻሜ ዝተሰፍረ ተመሊኡ ይኮዖ ኮይንዎ፣ ህዝቢ ከም ኣንበሳ ክጓዝም ጀሚሩ ኣሎ እምበር፣ ኣብ ዉሽጢ ሃገር ኣብ ቅድሚ ዓይኑ ዲኹም ደቁ ንሒፍኩሞም!!

እቶም ኣብ ዓዲ ኣበይቶ ዝተረፍረፉ ኸ ኣሜሪካ ድያ ኣርጊፋቶም? እቶም ኣብ ፍቆዶ ሃገር ብጅምላን ብተናጸልን ማዓልታዊ ዝሃልቁ ዘለዉ ኸ ህዝቢ ኤርትራ ኣይርእዮምን ኣይሰምዖም’ዶ ይመስለኩም። እቶም ኣብ ፍቀዶ ኣብያተ ማእሰርቲ ተማስንዎም ዘለኹ’ከ ደቂ እዚ መከረኛ ህዝቢ’ዶ ኣይኮኑን። እቶም ላዕለዎት ሓለፍትን ጋዜጠኛታት ከ ኣብ ጎንታናሞ በይ ድዮም ዘለዉ?

ዓለም ብዓለሙ ዝፈልጦ ነዉሪ ተዅልኲልኩም’ሲ መርቶዖታት ኣለና ክንማጎት ድልዋት ኣለና ክትብሉ። ትማሊ ትማሊ ጉጅለ 15 ዝገበርዎ በደል ብጭብጢ ተታሒዙ ኣሎ’ዶ ይባሃል ኣይነበረን። እቲ ህርፋን ስልጣን እምበር ሂወት ዜጋታት ዘይዓጦ መራሒኹም፣ ኵናት ዶባት ባዕሉ ከምዝጀመሮ ከምዝኣመነ፣ ካሕሳ ክኸፍል ከምተሳማመዐ’ኸ ንህዝቢ ዶ ተነጊርዎ? ሰይጣን ንኣመሉ መጽሓፍ ቅዱስ ይጠቅዕ ከምዝባሃል ንምድንጋር እምበር ካባኹም ንላዕሊ ንፍርዲ መን ክሕሰማ ይኽእል። ግን ክንዲዚ ኣሽካዓላል ክሳብ ማዓስ?

በሉ እቲ ሓቂ ክንድርጉሖ፣ ሬሳ ደቂ ሃገር ኣብ ባሕሪ ይኹን፣ ብስቃይ በደዊን፣ ማዓስከራት ኮነ፣ ኣብያተ ማእሰርቲ ብኮንቱ ይጠፍእ ኣሎ፣ ተሓታቲ እዚ ኩሉ ህልቂትን መከራን ዉርደትን ግፍዕን ድማ መራሒ ህግደፍን ዉሑዳት መጫፍርቱን እኺም። ሽግርና መዕረፊ ዝረክብ ምንጪ እዚ ጸበባ ምስ ነንቅጾ እዩ። ብጉዳይ ዶብን፣ እገዳን ከምጨዉ ኣብ ኩሉ እንዳ ኣእተኻ ምስምስ ግዜኡ ዝሓለፎ ብላይ ምስጢር ግዜኡ ኣብቂዑ እዩ። ኣብ ከተማ እንዳ ተዘመትካ ዶባት ምሕላዉ ከ እንታይ ትርጉም ኣለዎ። ኣሜሪካ ኣጽዋር እምበር ባንን ዝስተ ማይንሲ ህግደፍ እዩ ንህዝቢ ኤርትራ ኣጊድዎ ዘሎ። ፍርዲ ዕድለኛ እዩ ዝረኽቦ፣ ንባዓል ነጎዳ ሓዊ ደብሶ ዝዓይነቱ መግለጺታት ምዉጻእ ግን፣ ከምናይ ባዓል ቀዛፊ ከምከልቢ ኣብ ጎደና ምጉዳት ዉን ከምዘሎ ምስትዉዓል የድሊ።

ጽንዓት ንኹሉ ኤርትራዊ፣ ሓዘና ብጥፍኣት ህግደፍ ይደበስ!!!

ኣማን ጎይትኦም (ኤርትራዊ ብሕልና).