በቲ ናብ ትማሊ 14 ሰነ ኣብ ዘውግሐ ለይቲ ኣብ ለንደን  Grenfell Tower ኣብ ዝተባህለ 24 ደርብታት ዘለዎ ህንጻ ዘጋጠመ ከቢድ ቃጸሎ ናይ ዝሞቱ ግዳያት ቁጽሪ 17 ከምዝበጽሐ ፖሊስ ለንደን ሓቢሮም። 37 ግዳያት ኣብ ሆስፒታል ክንክን ይግበረሎም ከምዘሎ ብምግንዛብ ከኣ እቲ ቁጽሪ ክውስኽ ከምዝኽእል ስግኣቶም ገሊጾም።

ብመሰረት ሓበሬታ ማዕከናት ዜና ኣብቲ ህንጻ ክሳብ 600 ዝኣኽሉ ነበርቲ ይቕመጡ ከምዝነበሩ ይፍለጥ።

ደሃይ ቤተሰብን መሓዙትን ናይ ሓያለ ኣብቲ ህንጻ ዝቕምጡ ዝነበሩ ነበርቲ ዝጠፍኦም ሓያለ ተቐማጦ ለንደን ህላወን ሞትን ፈተውቶም ክፈልጡ ክሳብ ሕጂ ሸቕልቀል ክብሉ ብማዕከናት ዜናን ማሕበራዊ መራኸቢታትን ሓበሬታታት ክለዋወጡ ይርኣዩ ኣለዉ። ኣብ መንጎ ‘ቶም ደሃይ ኣጥፊኦም ዘለዉ ግዳያት፣ ኤርትራውያንን ኢትዮጵያውያንን ከምዝርከቡ ‘ውን ተፈሊጡ ‘ሎ።

ሓደ ካብቶም ደሃይ ኣጥፊኦም ዘለው ኤርትራዊ መበቆል ዘለዎ እንግሊዛዊ ምዃኑ ኣብ ቢቢሲ ዝተጠቕሰ Mo Tuccu ዝተባህለ ቤተሰብ ክበጽሕ ምስ ስድርኡ ናብቲ ህንጻ ምስ ከደ ሓደጋ ዘጋጠሞ ዜጋ

ናይ ዓይኒ መሰኻኽር ንማዕከናት ዜና ብዝሃቡዎ ሓበሬታ መሰረት ፣ ነበርቲ ናይቲ ህንጻ በቲ ብቕጽበት ዝተላብዐ ብርቱዕ ቃጸሎ ተሸቢሮምን ከእውዩን ክጭነቑን ክስምዑ ከለዉ፣ ህይወቶም ከድሕኑ ካብ መንበሪ ክፍልታቶም ክዘሉ ተራእዮም።

መራኸቢ ብዙሃን ዓዲ እንግሊዝ ብዘቕርቡዎ ዘለዉ ጸብጻባት መሰረት፣ ነበርቲ ናይቲ ህንጻ ዝሓቖፈ ኮሚተ ኣቐዲሙ ብተደጋጋሚ ግዜ ሓደጋ ቃጸሎ ከጋጥም ከምዝኽእል ዘቕረቡዎ ጥርዓን ብሰበስልጣን ሰማዒ ከምዘይረኸበ፣ ኣብ 2013 እቲ ህንጻ ካብ ሓደጋ ሓዊ ብጸቢብ ከምዝደሓነ ይግለጽ። ንድሕነቱ ብስድራቤቱ ካብ 9ይ ወይ 10ይ ደርቢ ዝተደርበየ ህጻን ኣብ ታሕቲ ኮይኖም ነቱ ኩነታት ካብ ዝከታተሉዎ ዝነበሩ ሰባት ተቖሊቡ ከምዝደሓነ ‘ውን መሰኻኽር ሓቢሮም።

ብወገን ቤተሰብ ናይቶም ደሃዮም ጠፊኡ ዘሎ ቆልዓ ሰበይቲ ዝርከቡዎ ሰባት ኮነ፣ ብሓፈሻ ኣብቲ ከባቢ ዝነበር ህዝቢ እኹል ሓበሬታን ግብረመልስን ብዘይምርካቦም ሕርቃኖም ክገልጹ ይስምዑ ከምዘለዉ ‘ውን ጋዜጠ ዘ ጋርድያን ጠቒሱ።

ንባርዕ ሓዊ ብዝምልከት ብኣካየድቲ ናይቲ ህንጻ ተለጢፉ ዝነበረ፣ ኣብ እዋን ሓደጋ ካብ ገዛኹም ኣይትውጽኡ ዝብል ዘይርዱእ መምርሒ ምስቲ ነበርቲ ኣቐዲሞም ዝህቡዎ ዝነበሩ ተደጋጋሚ መጠንቀቕታ ዘይምስምዑ ተደሚሩ ብወገን ወነንትን ኣካየድትን ናይቲ ህንጻ ሸለልትነት ከምዝነበረ ተፈጢሩ ብዘሎ ስምዒት ህዝቢ እቲ ከባብን ነበርቲ ‘ቲ ህንጻን ኣብ መራኸቢ ብዙሃንን ማዕበራዊ መራኸቢታትን እዚ “ሰብ -ሰርሖ ሓደጋ እዩ” ክብሉ ቆጠዐኦም ይገልጹ ኣለዉ።

እቲ ብርቱዕ ቃጸሎ ኣብ ቁጽጽር ክውዕል 24 ሰዓታት ወሲዱሉ፣ ኮምሽነር መጥፋእቲ ሓዊ ለንደን፣ ኣብቲ ተሃሚዅ ዘሎ ነዊሕ ህንጻ ቁጽሮም ዘይተፈልጠ ሬሳታት ከምዘለዉ ክገልጽ ከሎ፣ ናብቲ ቦታ ኣቲኻ ደቂቕ መጽራይ መንነት ግዳያት ምክያድ ኣብዚ እዋን ‘ዚ ኣጸጋሚ ኮይኑ ምህላዉሰበስልጣን ይጠቕሱ ኣለዉ።

መጥፋእቲ ሓዊ ለንደን ልዕሊ 200 ኣባላቱ ብምውፋር ነቲ ኩነታት ኣብ ትሕቲ ቁጽጽሩ ንምእታው ሓያል ጻዕሪ ከምዘካየደ፣ 9 ኣባላቱ ‘ውን መጠናዊ ጉድኣት ከምዝወረዶም ክግለጽ ከሎ፣ በቲ ኩነታት ዝሰንበደ ህዝቢ ‘ውን ነቶም ካብቲ ሓደጋ ዘምለጡ ኣማኢት ነበርቲ ኣድላዪ ምትሕብባርን ምጽጽንናዕን ይገብረሎም ኣሎ።

ጠንቂ ናይቲ ሓደጋ እንታይ ምዃኑ ኳ እንተዘይተገልጸ፣ ገለ ኣባላት ፓርላማ ከተማ ለንደንን ፖለቲከኛታትን ነቲ ህይወት ብዙሓት ሰባት ዝለከመ ቃጸሎ፣ ከም ኣሰቃቒ ቅዝፈት ብምግላጽ ገበናዊ መርመራ ክካየደሉ ጻውዒት የቕርቡ ኣለዉ።

መራሒ ሰልፊ ዕዮ ጀርሚ ኮርቢን እቲ ሓደጋ ብደቂቕ ተመርሚሩ ሓቁ ክወጽእ ኣለዎ ከምዝበለ ቢቢሲ ክሕበር ከሎ፣

ቀዳመይቲ ሚኒስተር ዓዲ እንግሊዝ ትሪዛ መይ እቲ ሓደጋ ህዝባዊ መርመራ ክካየደሉ ምዃኑ ገሊጻ።