ምስሊ ስርዓት ህግደፍ ከመሓይሽ ናይ ሎቢ ስርሓት የካይድ ምህላዉ ዝንገረሉ ማእከል ኣፍሪቃ ናይ ኣትላንቲክ ካውንስል፣ ብ 8 ታሕሳስ “Rethinking Eritrea.” ብዝብል ኣርእስቲ ኣብ ዋሺንግተን ዲሲ ሰሚናር ኣካይዱ።

ኣብቲ ሰሚናር፣ ኣብ ሰንኮፍ ናይ ዝርከባ ሃገራት ክኢላ Seth Kaplan፣ ቁጠባ ኤርትራ ስነሓሳብን ዕድላትን ብዝብል ኣርእስቲ ከምኡ ድማ ምኽትል ዳይረክተር ማእከል ኣፍሪቃ ኣትላንቲክ ካውንስል ብሮን-ዊን (Bronwyn Bruton) ምውጻእ ኤትራ ካብ ቀዝሒ ብዝብሉ ኣርእስታት ናይ ዘሕተሙዎም ጸብጻባት ሕመረት ትሕዝቶ ኣቕሪቦም።

Anthony Carroll ካብ ማእከል ስትራተጂካውን ኣህጉራውን መጽናዕቲ ከምኡ ድማ Dan Connell ካብ ማእከል መጽናዕቲ ኣፍሪቃ ኣብ ቦስተን ኡኒቨርሲቲ ከም ተዛተይቲ ኣብቲ ኣጋጣሚ ቀሪቦም።

ሚስተር ካፕላን ኣብ ጽሑፉ ስነሓሳብ መራሕቲ ህግደፍ ምስቲ ነቀይቀይ ዝብል ዘሎ ቁጠባ ኤርትራ ዘለዎም ምትእስሳር ክትንትን ከሎ፣ ሚስ ባርተን ከኣ ንኣሉታዊ ዝምድና ኤርትራ ኣመሪካን ብምድህሳስ ኣመሪካ ምስ ኤርትራ ኣብ ጽምዶ እትኣትወሉ እዋን ሕጂ ምዃኑ ትጽውዕ።

እቲ ብኣትላንቲክ ካንውስል ዝቐረበ ትሕዝቶን ዘተን ኣብ ቁጠባውን ወፍርን ብምትኳር፣ ነቲ ቀንዲ ዕንቅፋት ናይቶም ጽላታት ኮይኑ ዘሎ ፖለቲካዊ ቅልውላውን ጉዳይ ሰብኣዊ መሰላትን ኤርትራ ትሑት ግምት ዝሃበ ነይሩ። ይኹን’ምበር፣ እቲ ደረት ኣልቦ ሃገራዊ ኣገልግሎት ኣብ ኩሉ መዳያት ህይወት ኤርትራ ዘለዎ ኣሉታዊ ጽልዋ እቶም ተዛተይቲ ክኽሕዱዎ ኣይከኣሉን።

ኩላቶም ኣመሪካ ንጽምዶ ምስ ኤርትራ ኣተኵሮ ክትገብረሉ ክጽውዑ ከለዉ “ እቲ ማዕጾ እሞ ይከፈት፣ መራሕቲ ኤርትራ ብኡ ክኣትዉ ዝደልዩ ምዃኖምን ዘይምዃኖምን ሽዑ ይርአ” ዝዓይነቱ ጻውዒት እዮም ኣቕሪቦም።

ይኹን’ምበር ነቲ ጸብጻብ ኣመልኪቱ ግብረመልሲ ዝሃበ ጋዜጠኛ ቢቢሲ ነበር ማርቲን ፕላውት፣ ነቲ ናይ ኣትላንቲክ ካውንስል ትንተና ብምንባብ ነቲ ኣብ ኤርትራ ዘሎ ውድዓዊ ኩነታት ምርዳእ ከምዘይከኣል ብምጥቃስ፣ በንጻሩ፣ ብውሑዱ ነቲ መራሕቲ ኤርትራ ኣብ ዓለም ተፈሊጦምሉ ዘለዉ ምግሃስ ሰብኣዊ መሰላት ናይ ምድብዛዝ ተልእኾ ከምዘለዎ የገንዝብ። ነዚ ዕማም ‘ዚ፣ እታ ነዚ ኣጋጣሚ ዝወደበት ሚስ ባርተን ንሓያለ እዋናት ኣትኪላ ከምዝቐጸለቶ ድማ ብኣብነት ጠቒሱ።