ኣሰናዳኢ ኣሰና ኣማኑኤል ኢያሱ፣ ህዝባዊ ምንቅስቓስ ንሓድነትን ድሕነትን ኤርትራ ኣብ ሰያትል ብዝገበሩሉ ዕድመ መሰረት ትማሊ ቀዳም 20 መስከረም ኣብ ሰያትል፣ ሕቡራት መንግስታት ኣመሪካ ምስ ዝርከቡ ደለይቲ ፍትሒ ብምርኻብ፣ ብዛዕባ ምድንፋዕ ህዝቢ ዝሰረቱ ህዝባዊ ምንቅስቓስን ምቅልጣፍ ዲሞክራስያዊ ለውጢ ኣብ ኤርትራን ሰፊሕን ሃናጽን ዘተ ኣካይዱ።

ንሱ ኣብ መእተዊ ናይቲ ዘተ ኣብ ዝሃቦ መግለጺ፣ ህዝቢ ኤርትራ ይጠፍእ፣ ኤርትራ ከም ሃገር ትወድቕ ምህላዋ ብኣብነታት ድሕሪ ምብራህ፣ እቲ ጠንቂ ውድቀት ሃገርን ህልቂት ህዝብን ኮይኑ ዘሎ ዝቦኽቦኸ ምልካዊ ስርዓት ኢሳይያስ፣ ብጎነጽን ብምታላልን ናይ ህዝቢ ሓይሊ እናተጠቕመ ሃገር የዕኑ ከምዘሎ ኣብሪሁ። ህዝቢ ኤርትራ፣ መንግስቲ ብዘይ ህዝቢ ሓይልን ክእለትን ከምዘይብሉ ብምንግዛብ፣ ስምረቱ ኣረጋጊጹ ነቲ ብምልካዊ ስርዓት ተሰሪቑ ኣብ ጥፍኣቱ ዝውዕል ዘሎ ሓይሉን ኣምሊሱ ናይ ድሕነትን ራህዋን መሳርሒ ክገብሮ ከምዝግባእ ኣረዲኡ።

ኣብዚ ኩነታት ሃገርና ኣብ ኣስጋኢ ደረጃ በጺሑ ተኣፋፊ ኮይኑሉ ዘሎ መድረኽ፣ ኤርትራውያን እንታይ ገደሰኒ ከይበሉን ከይተዛነዩን ቅድሚ ኩሉ ምእንቲ ድሕነት ውጹዕ ህዝቦም ከምኡ ‘ውን ምእንቲ ቅሳነት ሕልናኦም ኣብቲ ብኸተማ ደረጃ ተወዲቡ ዘሎ ህዝባዊ ምንቅስቓስ ተጠርኒፎም ብንጥፈት ክዋስኡ ኣዘኻኺሩ።

ኩሉ ኤርትራዊ፣ ብጸቢብ ፍልልያትን ውልቃዊ ጠቕምታትን ካብ ቀዳምነቱ ከይተኣልየ ነዚ ኣብ ልዕሊ ሃገርን ህዝብን ተንጠልጢሉ ዘሎ ሓደጋ ንምዕጋት “ኣነ እንታይ ይገብር ኣለኹ” ኢሉ፣ ኣብ ምስልሳል ‘ቲ ሓባራዊ ዕላማ እጃም ክህልዎ ከምዝግባእ ምስ ገዛእ ነብሱ ብሕልና ተወዓዒሉ ሓላፍነቱ ክስከም ኣተሓሳሲቡ።

እዚ ኣብ ሰያትል ተመስሪቱ ዘሎ ህዝባዊ ምንቅስቓስ ንሓድነትን ድሕነትን ኤርትራ ከም ኣካል ናይቶም ኣብ ዝተፈላለያ ከተማታት ዝጥጥዑ ዘለዉ ህዝባዊ ምንቅስቓሳት፣ ቅርጹን ኣወዳድባኡን ኣጽፊፉ ህዝቢ ብምጥርናፍ፣ ምስቶም ካልኦት ተመሳሰልቲ ህዝባዊ ምንቅስቓሳት ጋድማዊ ዝምድናኡ ኣማዕቢሉ፣ ምስቲ ኣብ ውሽጢ ኤርትራ ዝርከብ ህዝባዊ ድሌት ንለውጢ እንተደኣ ተኣሳሲሩ፣ ኣብዚ ህዝቢ ኤርትራ ከካይዶ ዝግባእ መስርሕ ለውጥን ምርግጋጽ ፍትሕን ልዕልና ሕግን ኣውንታዊ ኣበርክቶ ክገበር ከምዝኽእል እምነቱ ገሊጹ።

ኣብ መወዳእታ፣ እዚ ህዝቢ ዝመሰረቱ ህዝባዊ ምንቅስቓስ፣ ነቲ ኤርትራውያን ደለይቲ ፍትሒ ዘሰላስሉዎ ዘለዉ ናይ ለውጢ ኣጀንዳ ዘዐውት፣ ሰፊሕተሳታፍነት ህዝቢ ዘረጋግጽ፣ ለውጢ ኣብ ርእሲ ምድራኽ ደግሲ ጥልመትን ውልቀመላኽነትን ከየጋጥም ውሕስነት ክኸውን ዝኽእል ክምዕብል ዝግብኦ እዋናዊ ኣወዳድባ ምዃኑ ብምግንዛብ ከኣ፣ ኣብ ዝተፈላለያ ኩርናዓት ዓለም ዝርከቡ ኤርትራውያን ኣብ ከምዚ ዝኣመሰለ ህዝባዊ ምንቅስቓሳት ክሳተፉ፣ ኣብ ከተማኦም ተመሳሳሊ መኣዲ ቃልሲ ክምስርቱ፣ እቶም ጀሚሮም ዘለዉ ‘ውን ብዕቱብነት ክሰርሑሉ ጸዊዑ።

ኣብ መእተዊ ናይቲ ህዝባዊ ኣኼባ ኣቦ ወንበር ሽማግለ ህዝባዊ ምንቅስቓስ ንሓድነትን ድሕነትን ኤርትራ ኣብ ሰያትል፣ ኣቶ ኣሕመድ ኑር ብርሃኑ፣ ብዘይ ተሳታፍነት ህዝቢ፣ እቲ ኩልና እንደልዮ ለውጥን ልዕልና ሕግን ክረጋግጽ ስለዘይክእል፣ ንህሉው ኩነታት ሃገርና ክነቕሓሉን፣ ንቕሓትና ናብ ምሉእን ስጡምን ውዳበ ክብ ኣቢልና ግብራዊ ስርሓት ብምስስልሳል ኣብ መስርሕ ለውጢ ተራና ከነዕዝዝ ይግባእ ክብል ለበዋኡ ኣመሓላሊፉ።

እቶም እዋናዊ ሕቶታትን ሃናጺ ርእይቶታትን ብምቕራብ ነቲ ዘተ ዘሀብተሙዎ ግዱሳት ተሳተፍቲ ተቐማጦ ሰያትልን ከባቢኣን፣ ወጻኢታት ህዝባዊ ምንቅስቓስ ንሓድነትን ድሕነትን ኤርትራ ንምሽፋንን ድምጺ ኣሰና ንምስሳንን ብኡ ንብኡ ልዕሊ $7000 ዶላር ኣወፍዮም።