እዚ ሎሚ ኣብዚ ተኣኪብናሉ ዘሎና ማዓልቲ (8 መጋቢት)፡ እቲ  እምቢ ንዓመጽ፡ ዘበት ንተምበርካኽነት ብምባል፡ ብዓለም ደረጃ ነጋሪት  ዝተሃረምሉ፡ቃልሲ ንጸረ ኩልንትናዊ ወጽዓ፡ ዝተወሰነሉ ማዓልቲ፡ ሓቢርና ክንዝክሮን ከነኽብሮን ምኽኣልና፡ እንካዕ ናብዚ ኣብቅዓና ይብል።

ኣብዚ ማዓልቲ’ዚ ዝተተለመ ፍትሓዊ ቃልሲ ደቂ ኣንስትዮ፡ ኣንጻር ዓማጽን ጨፍላቒን መርሆታት ደው ብምባል፡ ንማዕረ መሰል ውጽዕቲ ጓል ኣንስተይቲ ንምርግጋጽ ዝዓለመ’ኳ እንተኾነ፡ ብመሰረቱ ምዕሩይ ስርዓት መሕደራ ግን፡ ነቲ ዝሰፈሐ ክፋል ናይ ሓደ ሕ/ሰብ ኣዝዩ ኣገዳሲ’ዩ። ስለ ዝኾነ ድማ ኣሻማዊ እዩ።

ቃልሲ ደቂ ኣንስትዮ ብስሩን ብባህሩን፡ ፍትሒ፡ ዲሞክራሲ፡ ሰላም፡ ንምርግጋጽ ዘቕነዐ ቃልሲዩ። እቲ ምንታይ ረብሓን ጥቕምን ጓል ኣንስተይቲ፡ ኣብዚ ባይታ’ዚ ጥራይ ስለ ዝሰረ’ዩ። እዚ ድማ እቲ ዝዓበየ ክፋል ናይ ኣህዛብ፡ ሰላምን ርግኣትን ረኺቡ፡ ቀሲኑ ዝነብረሉን፡ ንልምዓት ዝግስግሰሉን ናይ ሓባር ጥቕሚ ዘውሕስ ባይታ ኣብርእሲ ምዃኑ፡ ንኩሉ ማኣዝናዊ ምዕባሌ ናይቲ ሕ/ሰብ ኣዝዩ ዝሰለጠ መንሃርያ’ውን እዩ።

ደቂ ኣንስትዮ ኤርትራ፡ ንቃልሲ ከምርሓ ከለዋ፡ ንመሰልና ብቓልስና ከነረጋጽ’ና ብምባል’የን ዓጢቐን።

ምኽንያቱ፡ እቶም ናብ ቃልሲ ክስራዓን ክስለፋን ዝጎስጎሱወን ተቓለስቲ ኣያታት፡ ንመሰልክንን ማዕርነትክን እተረጋግጸኦ ንስኽን ባዕልኽን ኢኺን።ንሕና ድማ ኣብ ጎንኽን ብምስላፍ ንመሰልክን ደው ክንብል’ና ብምባል ቅኑዕ መስመር ብኣግኡ ስለ ዘትሓዝወን’ዩ።

ይኹን እምበር፡ ዝዓጠቓሉ ዕላማ፡ ኣብታ ካብ መግዛእቲ ናጻ ዝኾነት ኤርትራ ዝትከል ብምኻኑ፡ እሞ እቲ ፍርቂ ኣካል ናይቲ ሕ/ሰብ ድማ ንሰን ብምዃነን፡ ምምላስ ሕቶ ሃገር ከም ግዴትአን፡ ብሓደ ወገን፡ ሕቶ ምርግጋጽ ማዕርነታዊ  መሰልን ድማ በቲ ካላኣይ፡ ድርብ ቃልሲ ጸመዳ።

መግዛእቲ ኢትዮጵያ ተሳዒሩ፡ ሃገር ናጻ ኮይና። እንተኾነ፡ እቲ ነቲ ምኩሕ መግዛእታዊ ስርዓት  ዘምበርከኸ ተባዕ ቃልሲ ህዝቢ ኤርትራ፡ በቲ ንሓቀኛ ምስሉ ሓቢኡ፡ ንሳላኻየ ዝቃለስ ዘለኹ እናበሎ ክመጽእ ዝጽንሐ፡ ባዓል ፍሉይ ዕላማ ኢሳያስ፡ ተሳዒሩ። ድርብ ዋጋ ዝተኸፍሎ ቃልሲ ጓል ኣንስተይቲ ኤርትራ ድማ ቀዲሙ ተሳዒሩ።

ህዝቢ ኤርትራ፡ ድሕሪቲ ዝኸፈሎ ዘይትመን ዋጋ፡ ተመሊሱ ኣብ ዳግመ ቃልሲ ኣትዩ ይርከብ ኣሎ።

ደቂ ኣንስትዮ ኤርትራ ድማ፡ ከም ዳሕራይ ቀዳማይ፡ ምሰ ኣሕዋተን ሓቢረን፡ ነቲ ብኢሰያስ ዝምራሕ ናይ ዕንወት ቅዲ፡ ካብስሩ ንምቡርቃቕ ብሓደ ሸነኸ፡መሰል  ጓል ኣንስተይቲ መለክዒኡ ዝገበረን፡ ንረብሓኣ ዘውሕስን፡ ዲሞክራስያዊ ስርዓት ንምትካል ድማ በቲ ካላኣይ፡ ንዕማማት ቃልሲ ብማዕረ ወዲነን፡ ሕጂ ውን ከም ትማሊ ብምባል፡ ድርብ ቃልሲ ከካይዳ ዳግም ባህርያዊ ግዴተኣን ኮይኑ ይርከብ’ሎ።

ኣብቲ ብ2011 ዓ/ም ኣብ ኣዋሳ ዝተጋበአ ሃገራዊ ጉባኤ ንዲሞክራስዊ ለውጢ፡ እተን ኣብኡ ዝተሳተፍና ውሑዳት ደቂ ኣንስትዮ፡ ብዓቕምና ነቲ ረዚን ዋጋ ዝተኸፍሎ ዕላማ ቃልሲ ጓል ኣንስተይቲ ኤርትራ፡ ኣብ ባይታ ዝስረተሉ፡ መባእታዊ ስጉምቲ ወሲድና ባሃልቲ’ና። መሰላትናን ረብሓናን ብምልኣት ኣብ ሃገራዊ ቅዋም ብጉቡእ ሰፊሩ፡ ውሕስን ተግባራውን ክኸውን ግና፡ ናይ ኩልና ደቂ-ኣንስትዮ ጥሙር ቃልሲ ይሓተና።

ኣብዚ ዝቀራረብ ዘሎ ካላኣይ ሃገራዊ ጉባኤ ንዲሞክራስያዊ ለውጢ፡ ስታፌ ደቂ ኣንስትዮ ዝሓሸን ኣድማዕን ንክኸውን ድማ፡ ኩላትና ክንደፍኣሉ ታሪኻዊ ግዴታና’ዩ።

በዚ ኣጋጣሚ፡ ንኹለን ደቂ ኣንስትዮ ኤርትራ፡ ኣብዚ ዝኸይድ ዘሎ ቃልሲ ክዓስላን፡ ንፍትሒ ደው ክብላን፡ ንመሰለን ሓቢረን ክጽዕታን መጸዋዕታ ከምሓላልፍ ይፈቱ።

ንመሰል ጓል ኣንስተይቲ ጎስዩ ንፍትሒ ይቃለስ ኣለኹ ዝብል፡ ንፍትሒ ዘይኮነስ ንዳግመ ዓመጽ’ዩ

ዓወት ንዕላማታት 8 መጋቢት

ውድቀት ንኹሎም ዓመጽትን መለኽትን

ክብርን ዝኽርን ንጀጋኑ ስውኣትና