እቲ ኣብ መዓስከር ስደተኛታት ኤርትራውያን ኣብ ኢትዮጵያ ቅድሚ ትማሊ ኣብ ማይ ዓይኒ ዝጀመረ ናዕቢ ስደተኛታት ትማሊ ኣብ ዓዲ ሓርሽ ተኸሲቱ ድሕሪ ምውዓሉ፣ ሎሚ ውን እንደገና ኣብ ማይ ዓይኒ ከምዝቐጸለን ቶኽሲ ‘ውን ከምዝተሰምዐ ምንጭታት ካብቲ ቦታ ሓቢሮም።

ኣብቲ ትማሊ ኣብ ዓዲ ሓርሽ ዝወዓለ ናዕቢ፣ ዛጊት ፈሊጥናዮ ከምዘለና ሓደ ኤርትራዊ ስደተኛ ብጥይት ተወቒዑ ክመውት ከሎ፣ ካልኦት 7 ከምዝቖሰሉ ተፈሊጡ።

እዚ ኸምዚ ኢሉ ኸሎ፣ ሎሚ ንጉሆ ንስደተኛታት ወኪሎም ናይ መሰል ሕቶ ኣለና ኢሎም ምስ መንግስቲ ኣካላት መንግስቲ ኢትዮጵያ ክራኸቡ ካብ ዝፈተኑ 50 ሰብ መምዮም ከምዝኣሰሩዎም ኣብቲ ቦታ ዝርከቡ ስደተኛታት ሓቢሮም።

ነቲ ኣብ ዝተፈላለያ መዓስከራት ስደተኛታት ኤርትራውያን ኣብ ኢትዮጵያን ዝተኸስተ ናዕብን ኣብ ልዕሊ ኤርትራውያን ስደተኛታት ወሪዱ ዘሎ ጉድኣትን ንምርዳእ ኣብቲ ከባቢ ንዝርከቡ ሓለፍቲ ንምዝርራብ ብተደጋጋሚ ዘካየድናዮ ናይ ቴለፎን ጻውዒት ኣይተዓወተን።

ንምሸቱ እቲ ናዕቢ ኳ እንተዓረፈ ወትሪ ከምዘሎን፣ ፈደራላዊ ፖሊስ ኢትዮጵያ ኣብቲ ከባቢ ከምዘለዉን ዝረኸብናዮ ሓበሬታ የረድእ።

እቲ ቅድሚ ትማሊ 6 ጥቅምቲ ማይ ዓይኒ ኣብ ዝተባህለ መዓስከር ዝፈለመ ናዕቢ መጀመርያ ብዝኽሪ ሽምዓ ናይቶም ግዳያት እዩ ጀሚሩ። ብዙሓት ካብቶም ኣብቲ ሓደጋ ዝወደቑ ኤርትርውያን፣ ዳግመ ምጥያስ ናብ ሳልሳይ ሃገር (Settlement) ደንጕዩዎም ዓቕሎም ኣጽቢቦም ናብ ሊብያ ሃጽ ምስ በሉ ዘጋጠሞም ሓደጋ እዩ ብዝብል ስምዒት እቶም ኤርትራውያን ስደተኛታት ኣብቲ ቦታ ንዝርከቡ ኣብያተ ጽሕፈት ኣራን UNHCR ን ኣእማን ምስ ደርበዩሉ እቲ ናይ ዝኽሪ ኣጋጣሚ ናብ ናዕቢ ከምዝተሰጋገረ ሽዑ ዝረኸብናዮ ሓበሬታ የረድእ። እቲ ፍጻሜ ምስ’ቲ ዘሕዝን ፍጻሜ ላምፐዱዛ ኳ እንተነቶገ፣ ነቲ ኩነታት ዘጓሃሃሮ እቲ ኣብ ኤርትራውያን ስደተኛታት ዘሎ፣ ገለ ኢትዮጵያውያን፣ ኤርትራውያን ስደተኛታት ተመሲሎም ብብልሽውና ነቲ ናብ ሳልሳይ ሃገር ናይ  ምጥያስ መሰል ክጥቀሙሉ ከለዉ፣ ጉዳይ ደንጉዩዎም ዝነፈጹ መንእሰያት ኤርትራ ኸኣ ኣብ ሓደጋ ይወዱ ኣለዉ ዝብል ስምዒት እዩ።

ዝምልከቶም ሓለፍቲ መንግስቲ ኢትዮጵያ እቲ ኩነታት ብኸመይ ከምዝተበገሰን ከምዝተነዓዓበን ከምኡ ‘ውን ወሪዱ ብዛዕባ ዘሎ ጉድኣትን ኣፈታትሓኡን ወግዓዊ መግለጺ ብምሃብ ነቲ ድንግርግር ዝበዝሖ ሃዋህው ከነጽሩዎን ከህድኡዎን፣ ንጥርዓን እቶም ስደተኛታት ሰሚዖም ‘ውን ምላሽ ክህቡሉ ይግባእ።