ቅድምን ድሕንርን ናጽነት ምእንቲ ሓርነትን ራህዋ ህዝቢ ኤርትራ ዝተቓለሱ፣ ገዲም ተጋዳላይ ዶር መሓመድ ዑስማን ኣቡበከር ኣብ መበል 73 ዓመት ዕድሚኦም፣ ብ 23 ለካቲት ኣብ ለንደን ዓሪፎም።

ስነስርዓት ቀብሮም ከኣ ኣብ ከባቢ ለንደን ‘ሳላም’ ኣብ ዝተባህለ መካነ መቓብር ሓመድ ኣዳምለብስ እዩ።

ኣብ ሕርጊጎ ዝተወሊዶም መባእታ ትምህርቶም ኣብ ሕርጊጎ ዝተኸታታሉ ዶር መሓመድ ዑስማን ኣቡበከር፣ ናይ ካልኣይ ደረጃን ዩኒቨርሲትን እንተላይ ናይ ዶክትረይት ትምህርቶም ኣብ ካይሮ ዩኒቨርሲቲ ዝፈጸሙ፣ ሓያለ መጽናዕታዊ ስርሓት ዘሰላሰሉ ካብ ቀዳሞት ወለዶ ምህራት ኤርትራውያን ‘ውን እዮም።

ቃልሶም ስለ ኤርትራን ህዝባን ምስ ምንቅስቓስ ሓራካ፣ ተጋድሎ ሓርነት ኤርትራ፣ ህዝባዊ ሓይልታት ሓርነት ኤርትራ ኣብ መወዳእታ ምስ ስሙር ውድብ በብደረጅኡ ክሳብ ዕለተ ሞቶም ከምዝቐጸሉዎ ይፍለጥ።

ድሕሪ ናጽነት ናብ ኤርትራ ተመሊሶም ኳ እንተነበሩ፣ ኣብ 1994 በቲ ስርዓት ግዳይ ጸቕጥን ሃድንን ኮይኖም ከምዝተጓሳቜሉ፣ ካብ ኣስመራ ምውጻእ ምስ ተኸልከሉ ‘ውን ብኢትዮጵያ ኣቢሎም ናብ ካሮ ከምዝሰገሩ ዝረኸብናዮ ሓበሬታ የገንዝብ።  ኣብ ለንደን ዑቕባ ረኺቦም ክሳብ ዝዓሰሉሉ ግዜ ኸኣ ካብ 2002 ኣብ ደምበ ተቓውሞ ኣባል ምሕዝነት ብምዃን ናይ ወጻኢ ጉዳያት ተጸዋዒ ኮይኖም ኣገልጊሎም።

ነፍሲሄር ዶር መሓመድ ዑስማን ኣቡበከር፣ ምስ ብዙሓት ዓበይቲ መራሕቲ ሃገራት ዓረብ ብኣካል ብምርኻብ፣ ኣብ ዓዲ ዓረብ ንቓልሲ ህዝቢ ኤርትራ ደገፍ ኣብ ምጕንጻፍ ብዘካየዱዎ ምንቅስቓስ ከምዝፍለጡ ይሕበር። ኣብ በይሩት ናይ ሚድያ ማእከል ኣብ ምምስራት ከምዝነጠፉ ‘ውን ይፍለጥ

ኣሰና ዶር መሓመድ ዑስማን ኣቡበከር መንግስተ ሰማያት የዋርሶም እናበለት፣ ንቤተሰቦም ጽንዓት ትምነየሎም።