ኣብ መጻረዪ ዋንጫ ዓለም 2018 ንምጽዋት ቦትስዋና ካብ ዝቐነየት ሃገራዊት ጋንታ ኩዕሶ እግሪ ኤርትራ10 ኣባላት ትማሊ ሰሉስ 13 ጥቅምቲ ኣብ ቦትስዋና ፖለቲካዊ ዑቕባ ከምዝሓተቱ Sunday Standard ዝተባህለ ጋዜጣ ናይታ ሃገር ኣፍሊጡ።

ብመሰረት እቲ ሓበሬታ፣ እቶም ናብ ኤርትራ ክምለሱ ፍቓደኛታት ዝኾኑ ተጻወቲ እቶም ኣብ ወጻኢ ሃገራት ዝቕመጡ ክኾኑ ከለዉ እቶም ኣብ ውሽጢ ዝነብሩ ግን ናብ ኤርትራ ምምላስ ተሓሲሞም ሕቶ ዑቕባኦም ንምስላጥ ኣብ መደበር ፖሊስ ናይታ ሃገር ከምዝርከቡ እቲ ጋዜጣ ሓቢሩ።

ምልካዊ ስርዓት ኢሳይያስ፣ ቦትስዋና ነቶም 10 ተጻወቲ ናብ ኤርትራ ክትመልሶም ጸቕጢ ይገብር ከምዘሎ ተፈሊጡ ‘ሎ። ይኹን’ምበር ኩሎም እቶም ኣብ ኤርትራ ዝመደበሮም ኤርትራውን ኣባላት ሃገራዊ ኣግልግሎት ስለዝኾኑ ብኣስገዳድ እንተተመሊሶም ኣብ ወትሃደራዊ ፍርዲ ብኽድዓት ተኸሲሶም ኣብ ሓደጋ ክወድቁ ከምዝኽእሉ ተጣበቕቲ ሰብኣዊ መሰላት ምጥንቃቖም እቲ ጋዜጣ ብተወሳኺ ይጠቅስ።

ተጻወቲ ኩዕሶ ኤርትራ ናብ ኣህጉራዊ ውድድራት ኣብ ዘዝኸዱሉ ኣጋጣሚ ብኸምዚ ዝኣመሰለ ጅምላዊ መንገዲ ዑቕባ ክሓቱ እዚ ንራብዓይ ግዜኦም እዩ።

እዚ ተደጋጋምን ጅምላውን ሕቶ ዑቕባ ኤርትራውያን ነጸብራቕ ናይቲ ድሕሪ ሶርያ ካልኣይ ተሰሪዑ ዓለም ኣሰኪሑ ዘሎ፣ ብሰንኪ ገስረጥ ምሕደራ እቲ ምልካዊ ስርዓት ዝሳዕረረ ዋሕዚ ስደት ኤርትራውያን መንእሰያት እዩ።

(ክቡራት ኣንብብቲ ምዕባሌታት ናይዚ ዜና ቀጻሊ ምክትታል ዘድልዮ እዩ)