እቲ ንነዊሕ እዋን ኣብ ገማግም ደቡባዊ ቀይሕ ባሕሪ ብዝነብሩ ዕለታዊ መነባብሮኦም ኣብ ፍርያት ባሕሪ ዝምርኮስ ህዝቢ ዓፋር እናተኣርየ ናብ ሚኒስትሪ ሃብቲ ዓሳ ተሽይጡ ድራር ዕለት ብዙሓት ስድራቤታት ዝሽፍን ዝነበረ ጽፍሪ ባሕሪ፡ ኣዘዝቲ ሓይሊ ባሕሪ ነቶም ድኻታት ኣረይቲ ጽፍሪ ባሕሪ ዜጋታት ብምህዳን እናኣሰሩ ነቲ ዝኣረዩዎ ጽፍሪ ባሕሪ መንዚዖም ንወጻኢ ብምሻጥ ኣብ ውልቃዊ ረብሓኦም የውዕሉዎ ብምህላዎም፣ ኣብ መንጎ ክልቲኦም ትካላት ናይቲ ስርዓት ከቢድ ምስሕሓብ ተፈጢሩ ከምዘሎ ምንጭታት ሓቢሮም።

እቲ ያታዊ ቁጠባዊ ንጥፈት ብቐረባ ዝምልከቶ ሚኒስትሪ ሃብቲ ዓሳ ማዕረ ናብ ቤትጽሕፈት ፕረዚደንት ብምጥራዕ ዓገብ ክብል ኳ እንተፈተነ ሰማዒ ስኢኑ ዝኾነ ምላሽ ከምዘይረኸበ ኣብ ኣስመራን ባጽዕን ዝርከቡ ምንጭታት ሓቢሮም።

እቶም ምንጭታት ብተወሳኺ፣ “ሓራምዝ ክባኣሱ ኣብ ትሕቲኦም ዘሎ ሳዕሪ የብርሱ” ከምዝብሃል ብሰሪ ‘ቲ ፋሉላዊ ምሕደራ ምልካዊ ስርዓት ኢሳይያስ ስርዓት ዝፈጠሮ ስርዓት ኣልቦነት ነቲ ድኻ ህዝቢ ዓሚጾም ‘ንዓይ ንዓይ’ ዝብሃሃሉ ዝብሃሃሉ ዘለዉ ክልተ ኣካላት ነቲ ካልእ ኣማራጺ ዘይብሉ ምስኪን ርሂጸ በላዕ ህዝቢ ግዳይ ገይሮሞ ከምዘለዉ ኣገንዚቦም።

እቲ ምእንቲ ምንዋሕ ዕድመ ስልጣኑ ንግርጭታት ሓለፍትን ኣካላትን እናባልሐን እናመዝመዘን ናይ ምክያድ ኣመል ዘለዎ ውልቀመላኺ ኢሳይያስ፣ ነቲ ኩነታት ርእዩ ከምዘይረኣየ ስቕ ምባሉ፣ ኣብ ህይወትን መነባብሮን እቲ ድኻ ህዝቢ ቅንጣብ ተገዳስነት ከምዘይብሉ ዳግም ዘረጋግጽ ምዃኑ ‘ውን ረዲኦም።

ምልካዊ ስርዓት ኢሳይያስ፣ ነቲ ኣብ ገማግም ቀይሕ ባሕሪ ዝነብር ህዝብና ንዘበናት ዝዕንገለሉ ዝነበረ ያታዊ  ምግፋፍ ዓሳ ዓሳ ከልኪሉ ከብቅዕ፣ ሕጂ ‘ውን ህዝቢ ጽፍሪ ባሕሪ ምሻጥ ሽይጡ መመላእታ መነባብሮኡ ከይገብር ብኸምዚ ዝኣመሰለ ማሕለኻታት ዕንቅፋት ፈጢሩ ብዘይ ዝኾነ ኣማራጺ ንሽግር ደርብዩ ብጥምየት ከምዝቕጻዕ ምግባሩ ዓቢ ገበን እዩ።