ኣይትነቑ ደርሆ !

ሰ0ሚዕኩምዶ ወረ - እታ ኣረጊት ጃልባ ሰዓብቲ ጺዒና - ናይ ሩሑቅ ቀረባ ኣብ’ቲ ምዉት ቃላይ - ኣድሕኑ ጠሊባ ዝመረሮ ህዝቢ - ብኣ ዝሓጎለ ደሓን ኩኒ ኢልዋ - ካብኡ እንክትፍለ ካፒተን ኢሰያስ - ዓቅሉ ምስ ጸበቦ ንኣቢይ ጸዊዑ - መፍትሕ ከረክቦ ዘገርም እኮ’ዩ

ሰ0ሚዕኩምዶ ወረ – እታ ኣረጊት ጃልባ

ሰዓብቲ ጺዒና – ናይ ሩሑቅ ቀረባ

ኣብ’ቲ ምዉት ቃላይ – ኣድሕኑ ጠሊባ

ዝመረሮ ህዝቢ – ብኣ ዝሓጎለ

ደሓን ኩኒ ኢልዋ – ካብኡ እንክትፍለ

ካፒተን ኢሰያስ – ዓቅሉ ምስ ጸበቦ

ንኣቢይ ጸዊዑ – መፍትሕ ከረክቦ

ዘገርም እኮ’ዩ – ክትሰምዖ ዘሕፍር

ኢሰያስን ጉንዲ – ህዝቢ ግን ጨናፍር

ናይ’ቲ ኣቢይ ከኣ – ካብኡ ዝገደደ

ክድምር ጀሚሩ  – ኢሉ ሓደ ሓደ

ጮርሖ ሒዙ – “መደመር” ዝብልዋ

ጣቓዒታ ኣብ ጎንደር – ሳዕሳዒታ ኣብ ሽዋ

ግደፍ ስግረ ዶብስ – ዋና ፈንፊንዋ

ቢተይ ሓምለ ሰነ – ተመለስ ንደሓር

ከምቲ ምድማርስ – ምቅናስ ተማሃር

ግደፍ ሎሚ  –  እግሪ ምስ ተከለት

ውልዶ ከላ’ዃ – ቀደም ነይተካእለት

ኣብ ማሕዘል ኮንካ – ርሑቅ ኣይትምነ

መጋቢት መጺእካ – መርዓ የሎን ሰነ

ሕማቅ ግዜ ኮይኑ – እንተ ሓሰማ ዓዲ

ናጽነት የብልናን – ዝልወጥ ብንግዲ

ጽቡቅ ሕልሚ ሕለም- ካብ ጥፍኣት መንገዲ

 

እንተ ናትና ግን ——

መንእሰይ ዘሎካ – በዚ ሎሚ ዕድመ

ኢድ ንኢድ ተተሓዝ – ምስ’ቲ ዝቀደመ

ሕብረት’ዩ ዘሕጽር – ናይ መላኪ ዕድመ

ብሰንኪ እገሊት – ብሰንኪ እገለ

ብዝብል ምስምስ – ካብ ኣደ ኣይንፈለ

ኣብ ምውጋሓ – እዛ ጸላም ለይቲ

ስምና ኣይነባላሹ – ንረሓቅ ካብ ጠለምቲ

ኣራዊት ዶ ኮይና – ኣብ ደገ ንሓድር

ኣዴና ክትዝመት – ንሕና ግን ንዕንድር

ሰብ እኮ ኢና –  ኣርሒቕና ንሓስብ

ስርናይ እንካብ ክርዳድ – ለሊና ንስብስብ

ንቅድሚት ክንስጉም – ንጠምት ድሕረና

ትንኪሒራ ይትረፍ – ማሕለካ እግሪና

ዝባና ሪኢና – ኣይንፍረዳ ከኣ

ንዓና ዝበለቶ – ኣሎ ኣብ ጓጕኣ

ይኣክል ኢልና – ብዓውታ ነጽምሞ

ነፍርሶ’ቲ ዕርዲ – ታሪክ ይኩን እጉሞ

ይጸርገፍ ይለዓል – ካብ ናይ ህዝቢ እንግድዓ

ይጥዓማ ‘ታ ኢዱ – እዚ ዓቢ ቆልዓ

ንተንስእ ብሓባር – ይኣክል ንበል

ደርሆ እዃ ረኪቡ – መተካእታ ደዎል

ኣይትነቑ ደርሆ- ዕረፍ ድሕሪ ደጊም

ተንሲኡ’ዩ ሎሚ – ታሪክ ንክደግም

 

መረጸ ኣስመላሽ    04/07/2019

 

 

 

 

 

 

 

 

 

 

 

 

 

 

 

 

 

aseye.asena@gmail.com

Review overview
2 COMMENTS
  • Danilo April 9, 2019

    Most welcome meretse, and thanks a lot by breaking your silence. Good poet / admirable job!

    ምዓል ሑልኹስ-ሓረኹርስ
    ምዓል ንሓሱ-ደቂ ፈሰስ
    ንሕና ንሱስ-ሳሰይቲ ኢሱስ
    ሓቂ መራር- ጀሚሮም ክብሉ ሱስ።

  • meretse April 10, 2019

    Thank you Dani
    As usual it is nice to hear from you and thank you for welcoming me.

POST A COMMENT