እቲ ንጸብጻብ መርማሪ ኮምሽን ኣብ ሰብኣዊ መሰላት ኤርትራ ናይ ህዝቢ ደገፍ የብሉን ኢሉ ንምቍንጻብ ካብ ህዝቢ ኤርትራ ክእክቦ ዝወጠነ ፌርማታት ብእምቢታ ኤርትራውያን ፈሺሉ ምእካል ስለዝኣበዮ፣ ብመንገዲ ተቓዋሚ ውድብ ኢትዮጵያ፣ ጉንበት 7 ኣቢሉ ፌርማ ኢትዮጵያውያን ኣብ ምልማን ዝወደቐ ውርደተኛ ስርዓት ኢሳይያስ፣ ነቲ ፈለማ ኣብ ዋሺንግተን ዲሲ፣ ቀጺሉ ኣብ ስዊዘርላንድ ብኣላይነት መራሕቲ ናይቲ ተቓዋሚ ጉጅለ ዘካየ ወፍሪ ርድኡና፣ ኣብ ፍራንክፈርት ‘ውን ንጽባሕ ቀዳም 11 ሰነ ክቕጽሎ ብዝለዓለ ይሸባሸብ ከምዘሎ ተፈሊጡ።

ከምቲ ኣቐዲምና ምስናይ ጭብጡ ኣቕሪብናልኩም ዝነበርና ኣብ ዋሺንግተን ዲሲ ዝተገብረ ለመና፣ ኣብ ዝሓለፈ ሒደት መዓልታት፣ ኣብ ስዊዘርላንድ ሓላፊ ግንቦት 7 ዶር ብርሃኑ ነጋ ኣብ ዝመርሖ ናይቲ ተቓዋሚ ወድብ ኣኼባ ሓደ ልኡኽ ምልካዊ ስርዓት ኢሳያስ ልኡኽ ተረኺቡ፣ 150 ፌርማ ካብቶም ኢትዮጵያውያን ተቓወምቲ ምርካቡ ብምምስጋን፣ ካብኡ ሓሊፉ፣ ባንዴራኹም ሒዝኩም ኣብቲ ንመርማሪ ኮምሽን ንምቅዋም ኣብ ጀኔቫ እነካይዶ ሰላማዊ ሰልፊ ኣባዝሑና ክብል ዝባኑ ቀሊዑ ተማሕጺኑ።

ኣብ ፍራንክፈርት ብሓፈሻ ድማ ጀርመን ዝርከቡ ኢትዮጵያውያን፣ ነዚ ግንቦት 7 ብስም ህዝቢ ኢትዮጵያ፣ ነቲ ኣብ ልዕሊ ውጹዕ ህዝቢ ኤርትራ ገበናት ንዝፍጽም ዘሎ ምልካዊ ስርዓት ንምድጋፍ ዝግበሮ ተደጋጋሚ ወፍሪ፣ ቃልና ኣይኮነን ብምባል፣ ኣብቲ ዕለት ‘ቲ ማለት 11 ሰነ ኣብ ፍራንክፈርት ናይ ተቓውሞ ሰልፊ ከካይዱ መዲቦም ከምዘለዉ ድማ ተፈሊጡ። ልዕሊ ዝኾነ ይኹን ወገን ነዚ ስቓይ ህዝቢ ኤርትራ ንምንዋሕ ዝካየድ ዘሎ ናይ ገበነኛታት ምሕዝነት ክንምክቶን ከነፍሽሎን ዘለና ንሕና ኤርትራውያን ብምዃና ድማ፣ ኣብ ፍራንክፈርትን ከባቢኣን ዝርከቡ ኤርትራውያን ደለይቲ ፍትሒ ኣብቲ ሰላማዊ ስለፊ ተረኺቦም ድምጾም ብዓውታ ከስምዑ ይግባእ።