ኢሳይያስ ንኹሉ ህንዱድ ሽግራት ህዝቢ ኤርትራ፣ እንተላይ ነቲ ኣብ ሰሃራን ሲናይን ኣሽሓት ኤርትራውያን መንእሰያት ዘህለቐ ንኤርትራውያን ከም ዜጋታት ዘድንነናን ዘሕነኸናን ታሪኻዊ ውርደት፣ ከምኡ ‘ውን ነቲ ኣብ ፈለማ ወርሒ ጥቅምቲ ኣብ ላምፐዱዛ 357 ህይወት ኤርትራውያን ኣብ ሓደ ወጋሕታ ዝቐዘፈ ንመላእ ዓለም ዘንቀጥቀጠ ጅማላዊ ጥፍኣት ክሑዱዎ እዩ። ንሱ፣ ነዚ ኹሉ ሓቅታት ንግዚኡ ገዲፉ፣ ሓንሳብ ንሃገራዊት ጋንታ ኤርትራ ከም መስትያት ቀሪቡ እንተዝጥምታስ፣ ኣበራቱ ደኾን ቁሩብ ምተሰቆሮ?

እወ፣ እዞም ናብ ኣህጉራዊ ውድድራት ዝለኣኹ ኤርትራውያን ስፖርተኛታት ካብ ሓፋሽ መንእሰይ ኤርትራ ብተዛማዲ ቁሩብ ፍንቃቕ ትንፋስን ናጽነትን ክህልዎም ኢኻ እትጽበ። ኣባላት ሃገራዊት ጋንታ ኤርትራ ብተደጋጋሚ ግዜ ንዘዝረኸቡዋ ቀዳመይቲ ዕድል ናብ ኤርትራ ከም ዘይተምልስ ትኬት one way ticket ክጥቀሙላ ከለዉ፣ ኣሽንባይዶ ንሓደ ሃገር ይመርሕ ኣለኹ ዝብል ኣካል፣ ብማዕዶ ንዝዕዘብ ወጻእተኛ ‘ውን፣ ንምኽኑይነት ናይቲ ግዳያት ሲናይን ላምፐዱዛን ዝወሰዱዎ ቅብጸታዊ ስጉምቲ ኣመት ዝህብ ተርእዮ እዩ።

እቲ ከሓዲ ኢሳይያስ ግን፣ መስትያት ኣይፈቱን እዩ። ከምዚ ናይ ሃገራዊት ጋንታ ኤርትራ እታ መስትያት ከም ጅሮሎ ባዕላ ኮረር ኢላ ኣብ ፊቱ እንተመጸቶ ‘ውን፣ ሓሙኽሽቲ ኣብዒጡ ክለኽያ እምበር፣ ገጹ ክርእየላ ኣይደልን። ጌግኡ ክቕበል ትብዓት ዘይብሉ፣ ባዕሉ ኣብ ዝፈጠሮ ብዓቲ ፍርሒ ዝነበር በትኪ ፍጡር ስለዝኾነ።

በዚ ምኽንያት ከኣ’ዩ፣  እታ ስለ ኢሳይያስ ኢላ ናብ 5 ዓመት ክትምጠጥ ዘይትኽእል ዓመታዊት ውድድር ኩዕሶ Cecafa፣ ኤትራውያን ስፖርተኛታት ስለምንታይ ብቐጻሊ ድሓን ኩን ይብሉዎ ከምዘለዉ ከይገምገመን ፍታሕ ከይረኸበሉን፣ ግዜኣ ሓልያ ህሩግ ምስበለቶ ኣብ መዋጥር ኣትዩ ከዕለብጥ ዝቐነየ።

ንሲኣይያስ ኣብ ውድድር Cecafa ምስታፍ ኮነ ምስታፍ ኩሉ ወዮ እዩ። ምኽንያቱ፣ እንተተረፈ ስለምንታይ፣ ተሳቲፉ ከምዚ ትማሊ ቀዳም ዝገበሩዎ ኣባላት ጋንታ ኤርትራ መሊቖም እንተተሸርቡ ድማ ስለምንታይ ንእትብል ሕቶ፣ ከምታ መስትያት ከሽክዓ  ኣይክእልን እዩ። ኢሳይያስ ነታ መስትያት፣ ብሓሙኽሽቲ ዝቐሸሻ ይመስሎ ይኸውን። ነታ መስትያት ግን፣ እቲ ሓሙኽሽቲ ኢሳይያስ ረቂቕ መጋረጃ እዩ፣ ክፍት ኣቢላ፣ ከም ቆልዓ “እምባሕ ኢሱ፣ ኣለኻ ዶ” ምባላ ከኣ ኣይተርፋን።

ስለዚ፣ እቶም ወጽዓን ዓመጽን ከም መዛኑኦም ዘሰንበሮም ተጻወቲ ኩዕሶ ኤርትራ፣ ወትሩ ካብ ዝወስዱዎ፣ ናብታ ስለምንታይ እትብል ሕቶ ዝውጥጦ ስጉምቲ ዑቕባ ከምልጥ፣ እታ ሃገራዊት ጋንታ ኣብ ወጻኢ ኣብ ስደት ብዝነብሩ ኤርትራውያን ከምእትዕብለል ገይሩ፣ ውሑዳት እሙናት ዝብሃሉ ካብ ውሽጢ ብጥንቃቐም መሪጹ ኳ እንተፋነዋ፣ እታ መስትያት ኣብ የዒንቱ ተደፍዲፉ ዘሎ ኣበራት ካብ ምንጽብራቕ ኣይበኾረትን። ካብ ውርደት ኣይተገላገለን። ምስዚ ኩሉ ጥንቃቒኡ ካብቶም እሙናት ኢሉ ኣብ ውሽጢ ሃገር ዘካየዶ ሕርያ ዘፋነዎም ሽዱሽተ፣ ክልተ እንተረጥሪጦሞ፣ ድሮ ልዕሊ 30 ሚእታዊት ሽንዲሖሞ ኣለዉ ማለት እዩ። እቶም ዝትረፉ ኣርባዕተ ተጻወቲ ዋላ ናብ ኤርትራ እንተተመለሱ ‘ውን እምነት ኢሳይያስ መሊሱዎም ክብሃል ናይ ግድን ኣይኮነን።

በቲ ኾይኑ በቲ ኢሳይይስ፣ ነቲ ሓሲኹ ዘሎ ልቡ ኣቸቶ ኣብ ክንዲ ዝኽዕወሉ፣ መስትያት ሓሙዅሽቲ ብምልባጥ ካብቲ ንኤርትራውያን ዘድልየና መሰረታዊ ፍታሕ ተሓቢኡ ክነበር ኣይክእልን እዩ። ወዮ ደኣ ግዜ ሓሊፉዎ፣ ዕብዳኑ ሳዕሪሩ እምበር፣ ሽግራት ብቕንዕና ፊትንፊት ገጢምካ ጽጹይ ገምጋም ብምክያድ፣ መሰረታዊ ፍታሕ ብምንዳይን ጥራይ እዮም ዝፍትሑ። በዚ ኮስሞቲክ ዝኾነ ጥበብ ድዉያት፣ ኣብ ኮስሞቲካዊ ሓይሊ ዘለዎ ቀይቃይ ወንበር ጥራይ እዩ ክጸንሕ ዝኽእል። ወንበሩ እትርዅመሸሉ ዕለት ከኣ ካብ ማንም ግዜ ንላዕሊ ቀሪባ ‘ላ። ሓቢርካ ኡፍ ምባል ጥራይ እዩ ዘድልያ።

ኣብዚ ከነስተብህለሉ ዘለና ሓደ ካልእ ካብ ኢሳይያስን ተንኮላቱን ዝዓበየ ጉዳይ ግን ኣሎ። እዚ ዜና ምስላም ኤርትራውያን ስፖርተኛታት፣ ንዓና ንመርበብ ኣሰና ኮነ ንህዝቢ ኤርትራ ብስራት ኣይኮነን። ኣብ ዜናታትና ከነንጸባርቖ ኸለና፣ እቲ ስጉምቲ ንኢሳይያስን ጉጅሊኡን ጽፍዒት ኳ እንተኾነ፣ ንኤርትራ ከም ሃገር ክሳራ ምዃኑ ንግንዘቦ ኢና። ብሰንኪ እዚ ካብ ናይ ኤርትራን ህዝባን ረብሓ ውልቃዊ ጥሙሑ ዝዓጅቦ ስሱዕ ስርዓት ኢሳይያስ፣ ኣብ ስፖርት ጥራይ ዘይኮነ፣ ኣብ ኩሉ መዳያት፣ ዓቕምን ሞያን ኤርትራውያን ፈቐዶ ኩርናዓት ዓለም ተበታቲኑ ይባኽን ምህላዉ ዘሕዝን እዩ። ይኹንእምበር፣ ነፍጺ ኤርትራዊ ካብ ሃገር ኣብቂዑ፣ በንጻሩ እቲ ዝተሰደ ናብ ሃገሩ ተመሊሱ መሓውርን ዓንድን ኤርትራ ክኸውን፣ እዚ ሃገር ረሚሱ ዘሎ ምልካዊ ስርዓት ካብ ገጽ ኤርትራ ተኣልዩ፣ መሰረታዊ ለውጢ ዘረጋግጽ ዲሞክራስያዊ ስርዓት ክጣየስ ኣለዎ። ምእንቲ’ዚ ኩላትና ኤርትራውያን ተወፋይነት ከነርኢ፣ ሕቡር ጸዓትን ቃልስን ከነካይድ ኣለና። ነዚ ዕማም’ዚ ብዓወት ከይፈጸምና ብስራት ዝብሃል የልቦን፣ ኩሉ መርድእ እዩ’ ሞ ህዝብና ከነበስር ንኹላትና ልብን ሓይልን ይሃበና።

ምልኪ ይፈርስ ሕጊ ይንገስ

ኣማኑአል እያሱ

2 ታሕሳስ 2013