ሃገራዊ መኸተ ዘንቅል፡ ምልኪ ዝፍንቅል

ህያብ ሓደ መስከረም

ሓርበኛ ተጋዳላይ ብርሃነ ኣብርሀ ንህዝቢ ኤርትራ

ኣብዚ ዝሓለፈ 3-4 ወርሒ፡ ፖለቲካ ኤርትራን ኢትዮጵያን፡ ተዋስኦ ተቐይሩ፡ ኣቢይን ኢሳይያስን ከኣ፡ ቀንዲ ተዋሳእን ተሓጋጋዝን ኮይኖም፡ ብሕልፊ ንህዝቢ ኤርትራ፡ ብኢትዮጵያ ተዃሊሉ መዓልታዊ ብዝምለጽእ ኣርእስተ ዜናታት ልቡ ድፍን ድፍን እናበሉ፡ ምድማርን ምጒዳልን ክሳብ ዘደናግሮ ከዐውኑዎ ኣብ ወፍሪ ከምዝቐነዩ ካብ ቀርኒ ኣፍሪቃ ሓሊፉ ኣብ መላእ ዓለም ዝበጽሐ ወቕታዊ ፖለቲካዊ ድራማ ኮይኑ ቀዊዑ `ሎ።

`ኤርትራ ተደሚራ ዓሰብ ተመቒላ` ተባሂሉ፡ ውክልና ኣቢይ ኣሕመድ ብዘይቃልዓለም ብኢሳይያስ ተመሪቑ፡ ኣብ ልዕሊ ህዝቢ ኤርትራ ዝተራእየ ንዕቀትን ብድዐን ዝተንጸባረቐሉ ጽላለ ኣስመራን ኣዋሳን ምስ በነነ፡ ብቴለቭዥን `ጽርግያ ዛላምበሳ ሰንዓፈ ይጽረግ ኣሎ` እናተባህለ፡ እቶም ሕምባሻ ተሰኪሞም ቆጽሊ ኣውሊዕ እናወዛወዙ ብመንገዲ ኣድጊ ዝገሹ ልኡኻት ሰላም ዛላምበሳ ግን ሰርሓ ክበጽሑ ኣይተፈቕደሎምን። እቲ ካብ ኣዋሳ መቐለ ዝረሓቐቶ ኢሳይያስ፡ ንመቐለ ብተምሳል መርከብ ባጽዕ ኣምጺኡዋ `ውን ተባሂሉ። ብሓጺሩ፡ እቲ ምድንጋር ንቡር ስኢኑ፡ እቲ ማዕረ ንሕጸ ሽልማት ኖቤል ሰላም ዘወናወነ ተዋስኦ ብሃማት፡ እቲ ብወረ፡ ልቢ ህዝቢ ኤርትራ ዝሃወጸ፡ ህላዊኡ ኣብ ባይታ ሃሰስ ኢሉ ዝሰኣኖ ሰላም ዝብል ኣርእስቲ ዝተዋህቦ ድራማ፡ ሓርበኛ ተጋዳላይ ብርሃነ ኣብርሀ ብምኽንያት ሓደ መስከረም ሓንቲ ሽምዓ ምስ ኣብርሃሉ ጥራይ ንተዋሳእቱ ለኪሙ መኺኹ።

እዚ ድማ ፖለቲካዊ ለውጢ ካብ ቤትካ ክጅምር ከምዘለዎ፡ ዘቤታዊ ፖለቲካዊ ኩነታት ከይጠዓየ ዝግበር ግዳማዊ ፖለቲካን ዲፕሎማስን ካብ ዜናዊ ሃልኪ ከምዘይሓልፍ ብጭብጢ ዘረጋግጽ እዩ።

በዚ ምኽንያት ከኣ `ዩ፡ ኣብ ዓሰብ ዝዓለበ 1ይ ሚኒስተር ኢትዮጵያ፡ ኢሳይያስ ተቐቢሉዎ፡ ፕረዚደንት ሶማል ተደሚሩዎም፡ ካብኡ ሓሊፉ፡ እቲ ን10 ዓመት ዝጸንሐ ግጭትን ወጥርን ኤርትራን ጅቡትን ናይ ምፍታሕ ኣንፈት ኣርእዩ እናተባህለ፡ ድራምኦም ብዘይካኦም ተዓዛቢ ስኢኑ፡ ኣቓልቦ ህዝቢ ኤርትራ ሚእቲ ካብ ሚእቲ ኣብ መልእኽቲ መኸተን ፍትሕን ለውጥን ሓርበኛ ብርሃነ ኣብርሀ ተጸሚዱ ዘሎ።

ውልቀመላኺ ኢሳይያስ ኣፈወርቂ፡ ሃምን ቀልብን ህዝቢ ኤርትራ ስለዝጠፍኦ ኣይኮነን፡ ነቲ ህዝቢ ኤርትራ ቀዳምነት ዝጠልቦ ዘሎ ውሽጣዊ ፖለቲካዊ ለውጢ ዕሽሽ ኢሉ ወሰን ወሰን ምስ መራሕቲ ሃገራት ሕግብግብ ዝብል ዘሎ። `ንህዝቢ ኤርትራ ክሳብ ዝኣኽሎ ኣዳኺመዮ እየ፡ ኣብ ዝበጽሖ የብሉን` ኢሉ፡ ነቲ ምስ ኩሎም ጎረባብቲ ሃገራት ዝጸንሖ ህልኽ ደማሚሩ ክጽዕኖ ውዲት ኣሊሙ ይሰርሓሉ ምህላዉ እዩ እቲ ጸገም።

እንተኾነ ግን፡ ህዝቢ ኤርትራ፡ ኢሳይያስ ከምዝጠለሞ፡ ኣብ ዋጋ ዕዳጋ የእትዎ ከምዘሎ ኣብ መደምደምታ ክበጽሕ ግዜ `ኳ እንተወሰደሉ፡ ጭብጢ ኣብ ዝረኸበሉ ሰዓት፡ ካብ ሓሙኹሽቲ ሓዊ ክፈጥር ዝኽእል ድጉል ሓይሊ ከምዘለዎ፡  እንሆ፡ በዚ ናይ ሓርበኛ ተጋዳላይ ብርሃነ ኣብርሀ ተባዕ ስጉምቲ ኣረጋጊጹዎ።

ብዛዕባ እኪትን ውዲትን ኢሳይያስ ብዙሕ ተዛሪብና፡ ህዝቢ ኤርትራ `ውን ኣጸቢቑ ነቒሑሉ ስለዘሎ፡ ኣብ ናይ ሎሚ መልእኽትና፡ ህዝቢ ኤርትራ ነዚ ሓርበኛ ብርሃነ ኣብርሀ ብምኽንያት ሓደ መስከረም ኣበርኪቱሉ ዘሎ ወርቃዊ ህያብ ብዘይ ወዓል ሕደር ኣብ ግቡእ ሃገራዊ መዓላ ክጥቀመሉ ከምዘለዎ ምዝኽኻር እዋናዊ እዩ።

ደቂ ሰብ ሰብዓታት ኣብ ዝረግጹሉ እዋን፡ ብልሙድ ናብ ቤተክርስትያን ኮነ መስጊድ እናተመላለሱ ብጸሎትን ምህለላን ምስ ኣምላኾም ብምርኻብ ኣብቲ ሰማያዊ ዓለም ዝህልዎም መጻኢ ከጣጥሑ እዮም ዝረኣዩ። ሓርበኛ ተጋዳላይ ብርሃነ ኣብርሀ 74 ኣብ ዝረገጸሉ ዕድመ፡ ብናይ መንእሰይ ሓይልን ነድርን ከምዚ ዝኣመሰለ ተባዕን ኣብነታውን መኸተ ምርኣዩ ግን ፡ ህዝቢ ኤርትራ ጸላእቱ እንተኣለልዩ፡ ካብ ሞት ንላዕሊ ምብኻን ዕላማ ዘፍርሖ፡ ምእንቲ ሓቅን መጻኢ ወለዶን መስዋእቲ ክፍጽም ዝተቐረበ ዘይጸዓድ፡ መካቲ ህዝቢ ምዃኑ ዘረጋግጽ እዩ።

ብውሑዱ ድሕሪ ናጽነት፡ ከም ተቓውሞ ተጋደልቲ፡ ኣካለ ስንኩላን፡ ቢተወደድ ኣብርሃ፡ ኣባላት ባይቶ፡ ሚኒስተራትን ጀነራላትን፡ ወዲ ዓልን ብጾቱን፡ ከምኡ `ውን ናይ ኣቦና ሓጂ ዓሊ ዝኣመሰሉ ዕድላት ሓሊፎምና ክብሃሉ ይኽእሉ እዮም። እዚ ሓርበኛ ብርሃነ ኣብርሀ ወሲዱዎ ዘሎ ተባዕ ስጉምቲ፡ ውልቀመላኺ ኢሳይያስ ኣፈወርቂ ናይ ኣስታት 60 ዓመት ቃልሲ ናጽነትን ልዑላውነትን ኤርትራ ዝጠለመ ከዳዕ ምዃኑ ዘረጋግጽ ጭብጥታት ተጋሂዱ፡ ህዝቢ ኤርትራ  ንኢሳይያስ ከም ጸላኢኡ ኣለልዩሉ ኣብ ዘሎ እዋን ምኽሳቱ ግን፡ ፍሉይ ብልጫ ኣለዎ። ስለዚ በንጻር ናይቲ ዝሓለፈ ተመክሮ፡ ህዝቢ ኤርትራ፡ ነዚ ተኣዊጁ ዘሎ ናይ መኸተን ብድሆን ዕድል ህዝባዊ ብምግባር፡ ንውዲት ኢሳይያስ ሓምሺሹ ዋና ናጽነቱን ልኡላውነቱን ክኸውን ብሓደ ክለዓል ኣለዎ።

ኣዘዝቲ ሓይልታት ምክልኻል ኤርትራን፡ ኣባላት ሃገራዊ ኣገልግሎት ኮይኖም ኣብ ሰራዊት ዝርከቡ መንእሰያት ኤርትራን `ውን፡ ሓርበኛ ተጋዳላይ ብርሃነ ኣብርሀ ብርዑ ሴፍ ተቐይራ ኣብ ክሳድ ውልቀምልኪ ዓሊባትሉ ኣብ ዘላ እዋን፡ እቲ ሃገር ንምክልኻል ዓጢቖሞ ዘለዉ ኣጽዋር፡ ከምቲ ግቡኡ፡ ሃገርን ህዝብን ኣብ ምድሓን ከውዕሉዎ ኣለዎም።

ውልቀመላኺ ኢሳይያስን በጻብዕ ዝቑጸሩ ጭፍርኡን፡ ከም ተኸላለልቲ ልኡላውነት ኤርትራ ንዓኻ ንህዝቢ ኤርትራ ኣብ ዘደናገሩሉ እዋን፡ ሓይሎም ንስኻ ኔርካ፡ ብዘይካኻ ቅልጽምን ዳንጋን የብሎምን። ኣብዚ ፖለቲካዊ ማስኬራኦም ተቐንጢጡ፡ በንጻሩ ተጻባእቲ ናጽነት፡ ጠለምቲ ሕድሪ ሰማእታት ምዃኖም መንነቶም ተቓሊዑሉ ዘሎ እዋን፡ ሓይልኻ ወኒንካ ሓንሳብን ንሓዋሩን እንተጸፊዕካዮም ከኣ መላሲ የብሎምን።

እቲ ሓይሊ ንስኻ ስለዝኾንካ፡ ኣብዚ እዋን`ዚ፡ ውልቀመላኺ ኢሳይያስ ንሓርበኛ ብርሃነ ኣብርሀ፡ ብተዘዋዋሪ ካብ ምትንዃል ሓሊፉ፡ ብቀጥታ ስጉምቲ ክወስደሉ ከቶ ኣይክእልን እዩ። ኣብ ርእሲኡ፡ ዝኾነ ስጉምቲ እንተወሲዱ፡ ብዘይካ`ቲ ካብ ህዝቢ ኤርትራ ከይመጽኦ ዝፈርሖ፡ ቁጡዕ ህዝባዊ ግብረመልሲ፡ እቲ 4 ኣዋርሕ ዝተዋስኣሉ፡ ንዓለም ዘማተአ ድራማ `ውን ኣብ ማይ ክኣቱ ስለዝኾነ ኣብ መንቀራቕሮ እዩ ዝርከብ ዘሎ። ስለዚ፡ ላዕለዋይ ኢድ ናትካ እዩ።

ዝኸበርካ ህዝቢ ኤርትራ፡ ሓርበኛ ተጋዳላይ ብርሃነ ኣብርሀ፡ ታሪኽ ሓርነታዊ ቃልስና ኣብ ዝነተጎሉ ዕለት 1 መስክረም ዘወፍዮ ህያብ ጻውዒት መኸተን ትንሳኤን፡ ካብ ጅብኡ ኣውጺኡ ኣይኮነን ዝምጽውተልካ ዘሎ። ዋንኡ ንስኻ ኢኻ። ነቲ ናትካ እዩ ዝመልሰልካ ዘሎ`ሞ፡ ብኽልተ ኢድካ ዓትዒትካ ኣብ ስዓቱ ንድሕነትን ትንሳኤን ሃገር ተጠቐመሉ። ዋንነቱ፡ መሰልካ ጥራይ ዘይኮነ ሓላፍነታዊ ግዴታኻ `ውን እዩ።

ምልኪ ይፍረስ ሕጊ ይንገስ!

ኣማኑኤል ኢያሱ

ዓርቢ 7 መስከረም 2018