ህቡብ ድምጻዊ ወዲ-ትካቦ ኣብ ላስቬጋስ፣ ሕቡራት መንግስታት ኣመሪካ፣ ንህዝቢ ዘበራበረ ውዕዉዕ መደብ ከምዘቕረበ ኣወሃሃድቲ ናይቲ ብምኽንያት ሓዱሽ ዓመት ዝተኻየደ መደብ ሓቢሮም።

ወዲ-ትካቦ በታ ዓቢ ኣድናቖት ረኺባ ዘላ “ንሓድነትና ሸጥ መዓንጣና”  እትብል እዋናዊት ደርፊ እዩ ፈሊምዎ። ቀጺሉ ካልኦት ዝተፈላለዩ ሓደስትን ናይ ቐደምን ሃገራውያን ደርፍታት ብምቕራብ ንህዝቢ ላስቬጋስ ከሳዕሰዖ ሓዲሩ።

ኣብቲ ኣማኢት ኤርትራውያን ተቐማጦ ላስቬጋስ ዝተሳተፉዎ፣ ሓድነትን ፍቕርን ደቂ ሃገር ዘንጸባረቐ ናይ ምዝንጋዕ መደብ፣ ኣብቲ ኣጋጣሚ ዝተሳተፉ ገለ ደገፍቲ ምልካዊ ስርዓት ህግደፍ፣ ሓደ ኴንንና ሽግርና ንፍታሕ ዝብል ርእይቶ ዝሃቡ ከምዝነበሩ እቶም ምንጭታት ብተወሳኺ ሓቢሮም።

እንተላይ ደገፍቲ ስርዓት ህግደፍ ዝተሳተፉዎ መደብ  ሓድነታውን እዩ ነይሩ ኣብቲ መደብ ዋላ ደገፍቲ ህግደፍ እውን ከምዝተሳተፉን ሓደ ኾይና ሽግርና ንፍታሕ ዝብል ርእይቶ ከምዝሃቡ ‘ውን ገሊጾም።

ኣሰናዳእቲ ናይቲ መደብ ኣብ መወዳእታ፣ እቶም ስነጥበበኛታት ምስ ውጹዕ ህዝቦም ብምውጋን ዘበርከቱዎ ዘለዉ ግደ ብምምጓስ ንድምጻዊ ወዲ-ትካቦ፡ ድምጻዊት ንያት፡ንሙዚቀኛታት ረዘነ፣ ዳዊት፡ ከበደ ከምኡ ጊደዎን ናይ ምስጋና ሽልማት ሂቦም።

ኣብቲ ኣጋጣሚ ደምበ ተቓውሞ ላስቬጋስ ኣብ ህጹጽ ደገፍ ስድራ ጅግና ስዉእ ወዲ ዓሊ  ዝውዕል  1000 ዶላር ኣወፊዩ ። ደምበ ተቓውሞ  ንብዓቲ ቤትን ሓድግን ናይቲ ምእንቲ ሓርነት ህዝቢ ኤርትራ ዝተሰወአ ጅግና ወዲ ዓሊ ናይ ምእላይ ሓላፍነት ከምዘለዎ ብምዝኽኻር ከኣ ንዕለት 22 ጥሪ 2014 ዓቢ ናይ ዝኽሪ መደብ ኣድላዩ ከምዘሎ ንነበርቲ ላስቬጋስ ሓቢሩ።