ዎ ክቡር ህዝቢ ኤርትራ፥

ብዓንተቦ ፈታው ሰላምን ደላይ ሰናይን ህዝቢ ኢኻ። ኣብዚ እዋን ልዕሊ ዝኾነ ኻልእ ሰላም፡ ራህዋን ቅሳነትን ከምዘድልየካ ድማ ርዱእ ኢዩ።

ይኹን’ምበር ንሰላም ይኹን ንዂናት፡ እንታይ፡ ስለምንታይ፡ ብኸመይ፡ መዓስን ምስ መንን ከይበልካ ምእታዉ ካብ ጥቕሙ ጉድኣቱ ዝመዝነሉ ግዜ ክህሉ ስለዝኽእል ምጥንቃቕ ኣድላዪ ኢዩ። ኣብዚ ክልተ ኣዋርሕ ዘይመልእ ግዜ ኣዝዩ ብዙሕን ብፍጥነት ዝካየድን ኣብ መንጎ ኤርትራን ኢትዮጵያን ንዘሎ ናይ ሰላም ድሌት ዘንጸባርቕ ክስተታት ክርአ ጸኒሑ ኣሎ።

እዚ ግቡእ መስርሕ ከይተኸተለ ክኸይድ ዝጸንሐ ጉዳይ፡ ኣብዚ ግዜ’ዚ ኣብ ልዕሊ ኤርትራን ህዝባን ዝተኣልመ ናይዚ ዘመን ዝተራቐቐ ጎበጣ ምዃኑ ጎሊሑ ይርከብ። ቀዳማይ ሚኒስተር ኢትዮጵያ ዶ/ር ኣብዪ ኣሕመድ ኣብ ሕቡራት መንግስታት ኣመሪካ (ዋሺንግተን ዲሲ) ምስ  ኢትዮጵያውያን ኣብ ዝገበሮ ርክብ፡ ‘ጉዳይ ዶብ ኤርትራን ኢትዮጵያን ከምዘይተላዕለን ንሱ ካልኣዊ ምዃኑን’ ምግላጹ ድማ ናይዚ መርኣያ ኢዩ።

ብኻልኣይ ደረጃ ግን ምናልባት፡ እቲ ቀዳማይ ሚኒስተር፡ ነቶም ኤርትራ ርእሳ ዝኽኣለት ሃገር ምዃና ክሳብ ለይቲ ሎሚ ዘይተዋሕጠሎም ናይ ብሄረ ኣምሓራ መራሕቲ ኣብ ምኽሳብ ኣተኲሩ፡ ነቲ ኢሰያስ ኣፍወርቂ ካብ እዝኒ ኤርትራውያን ርሒቑ ክጸንሓሉ ዝደልዮ ሓቂ ብምድርጓሕ፡ ንመራሒ ስርዓት ህግደፍ ብዕጽፍጻፍ ስጉምታት  ቀዲምዎ ብምጓዓዝ ኣብቲ ‘ናይ ሰላም’ ድራማ መሪሕ ተራ ይጻወት ምህላዉ ከረጋግጽ ክኢሉ ኣሎ።

ኣብቲ ዝተዋህቦ ተራ ሃገሩ ምስ ግብጺ (እታ ዘድልያ ክትስእን ዘይብላ ዓረባዊት ሃገር) ካብ ከካራኽራ ዝጸንሐ ናይ ፈለግ ኒል ቁርቁስ ከውጽኣ ሓደ ጥበብ ክምሃዝ ነይሩዎ። ኤርትራ ከኣ እታ ንማሕረዲ ዝተቐረበት በጊዕ ክትከውን ተመሪጻ። ምስ’ታ በጊዕ ዘለወን ሓደ ፍልልይ እንተሃልዩ፡ ኤርትራ ኣብ ክንዲ ክትሰብሕ፡ ደቃ ንስደት ጸሪሮም፡ ባዲማ፡ ዝተረፉ ከኣ ኣብ ናይ ግዜ ገደብ ዘይብሉ፡ ንምጽማዶም ዝተማህዘ ዕስክርና ተቖሪኖም፡ ማሲና ምጽናሓ ኢዩ።

ግብጺ ዘድልያ ክትረክብ፡ ኢትዮጵያ ትደልዮ ክትስእን የብላን። ንፉዓት ሸምጋሎ ኣብ ዝውዓሉሉ፡ እተን ክልተ ክሕጎሳ፡ እታ ህዝባ ብኣፉን ብትንፋሱን ዝተታሕዘላ ኤርትራ ግዳይ ክትከውን ተፈሪዳ።

ብዘይካ’ዚ ግን ኤርትራ ኣብ ቀርኒ ኣፍሪቃ ትርከብ ምዃና’ውን ኣይሓገዛን። ዝተደኮነትሉ ቦታ ቁልፊ ብምዃኑ ኩሎም ሓያላትን ሓያላት ክኾኑ ዝምነዩን ዓይኖም ዘውድቑሉ ዞባ ምዃኑ ብሩህ ኢዩ። ሕቡራት መንግስታት ኣመሪካ ከም ናይ ዓለምና ፖሊስ መጠን፡ ቀይሕ ባሕሪ ዝኣክል ክሳድ ከገድሳ ድማ ባህርያዊ ኢዩ። ነዚ ክሳድ ንምሓዝ ብኢደበዛነት ዘገልግላ ሃገራት ድማ ክስኣና ኣይክእላን።

ሕቡራት ኢማራት ዓረብን ስዑዲ ዓረብን ከም መሻርኽቲ ኣመሪካ መጠን፡ ዝኾነ ኣብ ቀርኒ ኣፍሪቃ ይኹን ኣብ ዓሰብ ዝህልወን ጽልዋ ብቐጥታ ይኹን ብተዛዋዋሪ ንኣመሪካ ዘርብሕ ኢዩ። እዚ ማለት ከኣ ልዕልና ሕጊ ዝነገሰላ ዲሞክራስያዊት ኤርትራ፡ ንረብሓ ህዝብን ሃገርን እምበር ንረብሓ ዝኾነ ኻልእ ሓይሊ ባይታ ክህልዋ ስለዘይክእል ክምዝምዝዋ ዝደልዩ ኩሎም ባእታታት ብመትከል ዝቃወምዎ ሓደ ነገር እንተሃልዩ ምህናጽ ናይ ሓንቲ ከምኡ ዝበለት ኤርትራ ኢዩ።

ብኣንጻሩ ናትና ዕማም፡ ህላወ ኤርትራን ኤርትራውያንን ንምውሓስ ብልዕልና ሕግን ዲሞክራስያውነትን ዝልለ ድልዱል ሰረት ዘለዎ ፖለቲካዊ ስርዓት ምህናጽ ክኸውን ኣለዎ።

ካባና ንደቡብ ከኣ ሓንቲ ትዓኑ ዘላ ትመስል ጎረቤት ኣላትና። ኢትዮጵያ ጎረቤትና ብምዃና ሰላማ ንዓና ኣድላዪ ኢዩ። እዚ ማለት ግን ህላወና ከም ህዝብን ሃገርን ይኹን ሃገራዊ ረብሓና ኣብ ዋጋ ዕዳጋ ከነእቱ ኣለና ማለት ኣይኮነን። ካብ ኣካይዳ  ኢሰያስ ክንርድኦ ከምዝኽኣልና ንሱ ንኤርትራን ኤርትራውያንን ብግህዶ ኣብ ዕዳጋ ኣውሪዱ ንበላዒ ሂቡና ከምዘሎ ኢዩ።

እታ ኣብ ውሽጣ ተሓማሚሳ፡ ሓደ ብሄር ምስ ካልእ ክትሃናኾቱ ዝውዕሉላ፡ ፕረዚደንት ክልል ትግራይ ዶ/ር ደብረጽየን ከም ዝበሎ “ተኻባቢርካ ምንባር ዘይክኣል እንተኾይኑ ምብትታትን ኣሎ” ዝዓይነቱ ኣተሓሳስባ ዘስፋሕፋሓላ ኢትዮጵያ፡ ኣብ ውሽጣ ሰላም ከይገበረት፡ ብሄራታ ከይደመረት ምስ ኤርትራ ኣብ ሰናይ ጉርብትና፡ ምክብባር ዝመልኦ፡ ኣብ ሓባራዊ ረብሓ ዝኣምን ሰላም ክትገብር ትኽእል ኢያ ኢልካ ምሕሳብ የዋህነት ኢዩ።

መራሕቲ ኣምሓራ ክልተ ክሓውያ ዘይክእላ ሕማማት ኣለዎኦም። ንሳተን ከኣ ናይ ስልጣን ስስዐን ናይ ቀይሕ ባሕሪ ፍቕርን ኢየን፡፡ “ንሕና ገዛእቲ ምበር ተገዛእቲ ኣይኮናን፡ ትግሬ ንዓና ክገዝኣና ኣይክእልን። ንሕና እናሃለና ኦሮሞ ከመይ ኣቢሉ ኣብ ስልጣን ይድይብ” ዝብል ኣተሓሳስባኦም፡ ብኣተሓሳስባ ኣብ 21 ክ/ዘመን ዘይኮነ ኣብ 16 ክ/ዘመን ተሪፎም ከምዘለዉ ዘርኢ ኣብ ርእሲ ምዃኑ፡ ምስ ጎረባብቲ ኣህዛብ ካልኦት ሃገራት ይትረፍ’ሞ ምስ ካልኦት ኢትዮጵያውያን’ኳ ብሰላም ክነብሩ ዘይክእሉ ምዃኖም ኣመስኪሮም ኣለዉ።

እዚ ናይ ኢትዮጵያ ናይ ዓሌትነት ፖለቲካ ናብ ዉጹእ ኲናት ተቐየሩሉ ኣብ ዘሎ እዋን፡ ናይ ኤርትራ ጉዳይ’ውን ከም ዝተወጠኖ መጥፍኢ ሓዊ ክኸውን ኣይክኣለን። ንግዚኡ ጥራይ ዩ ቆላሕታ ስሒቡ፡፡ ነቶም ኣብ ድሮ ምሕራር ኤርትራ “ክንምለስ ኢና” እናፈከሩ ካላሽን ኮቮም እናጎሰሱ ዝተሰወሩ ወታሃደራት ደርግ ነበር ከኣ ባ ብታሕጓስ ኣኽመስሚሱዎም።

እዚ ካርታ ኤርትራ ምስ ኢትዮጵያ ሓዊስካ ምስኣል፡ ኣብ ናይ ኲናት ባይታ ተሳዒርካ ጭራኻ ደጒልካ ከምዘይወጻእካ ሰላማዊ ተመሲልካ ናብ ኤርትራ ኣቲኻ ባንዴራኻ ኣብ መሬት ኤርትራ ን’ቀልድ’ ኣምሲልካ ምትካል ድሓን ናይ ዕሽነትን ኣብዛ ዓለም ብዘይካ ነብሶም ካልእ ሰብ ከምዘየለ ዝሓስቡ ከምዘለዉዎም  ከምመርኣያ ተዘይኮይኑ፡ ክሳብ ክንድቲ ግምት ክውሃቦ ዝክኣል ኣይኮነን።

ንህዝቢ ኤርትራ ግን እዚ ኣሽካዕላል’ዚ’ውን ኣኺሉ ተሪፉሉ ኣሎ።  ክንግነዘቦ ዘለና ነገር ኤርትራ ርእሳ ዝኽኣለት ሃገር ብዛዕባ ምዃና ኣብ ባይታ ክቕየር ዝኽእል ዘይምህላዉ ኢዩ። እዚ ማለት ግን ክሳብ ሎሚ ክንከዶ ዝጸናሕና፡ ናይ እንታይ ገደሰኒ ኣካይዳ ገዲፍና፡ ኣብ ጉዳይና እጅገና ሰብሲብና ንጡፋት ተሳተፍቲ ክንከውን ኣለና ማለት ኢዩ። እዚ ጉዳይ ናይ ህይወትን ሞትን ጉዳይ ካብ ዝኸውን ግዜ በሊዑ ከምዘሎ ፈሊጥና፡ ህዝብናን ሃገርናን ከነድሕን ታሪኻዊ ሓላፍነት ኣለና።