ሚኒስተር ፋይናንስ ነበር ኣቶ ብርሃነ ኣብርሀ፡ ንፖለቲካዊ ኩነታት ኤርትራ ብሕልፊ ድማ ንውልቀምልካውነት ኢሳይያስ ኣፈወርቂ ንምቅላዕ ኣብ ውሽጢ ኤርትራ ደሪሱ ኣብ ወጻኢ ዘሕትሞ ዘሎ እዋናዊ መጽሓፍ፡ ኩልና ኤርትራውያን ከም ኣብያ ምልካዊ ምሕደራ ብኣብነት ክንክተሎ ዘለና ተባዕ ስጉምቲ ምዃኑ ኣቶ ክብሮም ዳፍላ ገሊጹ።

ንሱ ሎሚ ምስ ኣሰና ኣብ ዝገበሮ ሓጺር ዝርርብ ፡ ንትሕዝቶ ናይቲ መጽሓፍ ብሓጺሩ ብምብራህ፡ ኣብዚ ተኣፋፊ ፖለቲካዊ ኩነታት ኤርትራ ከምዚ ዝኣመሰለ እዋናዊ ፖለቲካዊ ትሕዝቶ ዘለዎ፡ እንተላይ ነቲ ኢሳይያስ ብልኡላውነት ኤርትራ ንምውጋይ ዝጸንሖ ሕዱር ዝንባለ ዘቃልዕ መጽሓፍ በቲ መዋእሉ ኣብ ቃልሲ ንናጽነት ዘሕለፈ፡ ብደረጃ ሚኒስተር ውን ኣብ ዝተፈላለዩ ሚኒስትሪታት ዘገልገለ ገዲም ተጋዳላይ ብርሃነ ኣብርሀ ምቕራቡ ንህዝቢ ኤርትራ ናይ ለውጥን ቃልስን መሳርሒ ስለዝኾነ፡ ከም ሃገራዊ ጸጋ ርኢና ንድሕነት ሃገርናንን ረብሓ ህዝብናን ክንጥቀመሉ ከምዘለና ኣተሓሳሲቡ።

ኣብቲ ስርዓት ኣብ ዝተፈላለዩ ጽፍሕታት ዝርከቡ ሰበስልጣን ይኹኑ ሰራሕተኛታት ነዚ ኣቶ ብርሃነ ኣብርሀ ዝወሰዶ ተባዕ ስጉምቲ ካብ ምኽታል ሓሊፎም ህዝቢ `ውን ተዓዛቢ ካብ ምዃን ሓሊፉ ደገፉ ብምግላጽ ነቲ ኣቶ ብርሃነ ዝወሰዶ ኣብያ ምልካዊ ምሕደራ ህዝባዊ ገይሩ ኣብ ምዓላ ለውጢ ክጥቀመሉ ከምዝግባእ `ውን ኣዘኻኺሩ።

ብመሰረት ሓበሬታ ኣቶ ክብሮም እታ ፡ሃገረይ ኤርትራ ዘርእስታ መጽሓፍ ኣብዚ ሰለስተ ኣርባዕተ መዓልታት ክትዝርጋሕ እያ።

ሚኒስተር ፋይንናስ ነበር ኣቶ ብርሃነ ኣብርሀ፡ ንውልቀምልካዊ ምሕደራ ኢሳይያስ ኣፈወርቂ ብምቅዋሙ ደስኪሉ ከምዝጸንሐ፡ ብዓልቲ ቤቱ `ውን ኣብ ማእስርቲ ምልካዊ ስርዓት ኢሳይያስ ከም እትርከብ ይፍለጥ።

ክቡራት ሰማዕትና፡ ብዛዕባ`ቲ ማዕረ ማዕረ ውዕሎ ጀኔቫ ዝወጸ `ሞ ኣተኩሮና ኣብኡ ተጸሚዱ ብምጽንሑ ምስ ጽጹይ ሓበሬታኡ ከነቕርበልኩም መታን ብእዋኑ ዘይተዛረብናሉ ተባዕ ስጉምቲ ብዝምልከት ምስ ኣቶ ክብሮም ዳፍላ ዝገበርናዮ ሓጺር ዝርርብ ድሕሪ ዜና ከነቕርበልኩም ኢና።