ማሓመዶ ጋሳማ ዝተባህለ ናብ ፈረንሳ ብዘይሕጋዊ መንገዲ ዝኣተወ ወዲ 22 ዓመት ማላዊ ስደተኛ፡ ኣብ ከተማ ፓሪስ ብዘይመሳልል ብቕጽበት ናብ ራብዓይ ደረጃ ፐላሶ ብምሕኳር ጫፍ መንደቕ ሒዙ ተንጠልጢሉ ናይ ዝነበረ ህይወት ወዲ ኣርባዕተ ዓመት ቆልዓ ካብ ምጽዳፍ ብምድሓኑ፡ ናብ ቤተመንግስቲ ፈረንሳ ተዓዲሙ ብ ፕረዚደንት ፈረንሳ አማኑዌል ማክሮን ናይ ጅግንነት ማዳልያ ክሽለም ከሎ፡ ብኡንብኡ ዜግነት ፈረንሳ ተዋሂቡ። ኣብ መጥፋእቲ ሓዊ ፈረንሳ ናይ ስራሕ ዕድል ክኽፈተሉ ምዃኑ `ውን መብጽዓ ኣትዩሉ።

እቲ ትማሊ ኣብ ማዕከናት ዜና ዓለምን ማሕበራዊ መራኸቢታትን ተሃቢቡ መዛረቢ ኮይኑ ዝወዓለ፡ ብ ከንቲባ ፓሪስ፡ ናይ ፓሪስ `ስፓይደር ማን` ተባሂሉ ዝተመጎሰ መንእሰይ ማላዊ ስደተኛ፡ ንጋዜጠኛታት ኣብ ዝሃቦ ሓበሬታ፡ ብዛዕባ ህይወቱ ከይሓሰበ ህይወት ናይቲ ኣብ ኣፍደገ ሞት ዝነበረ ቆልዓ ንምድሓን ቅጽበታዊ ስጉምቲ ከምዝወሰደ ኣገንዚቡ።

እቲ ካብ ፈለማ ክሳብ መወዳእታ ብ ሞባይል ቪድዮ ተሳኢሉ ኣብ ኢንተርነት ዝተዘርግሐ ማሓመዶ ነቲ ቆልዓ ከድሕን ከሎ ዘርኢ ስእሊ ኣዝዩ ዘገርም ፍጥነትን ትብዓትን ናይቲ መንእሰይ፡ ልዕሊ ኹሉ ድማ በንጻር`ቲ ካብ ማሊ በቲ መዓት ወሪዱዎ ዘሎ ሃገረ ሊብያን ማእከላይ ባሕርን ኣቢሉ ኤውሮጳ ክኣቱ ኸሎ ዘጋጠሞ ዘይሰብኣዊነት፡ ዘርኣዮ ልቢ ህዝቢ ዓለም ዝመሰጠ ሰብኣውነት የጒልሕ።

እቲ ብጥልያን ኣቢሉ ናብ ፈረንሳ ብዘይሕጋዊ መንገዲ ካብ ዝኣቱ 6 ወርሒ ዝገበረ ኣብነታዊ መንእሰይ፡ ሓያለ ዝኾኑ በቲ ጉዳይ ዝተጨነቑ ጎረባብትን ሓለፍቲ መንገድን ዝገብሩዎ ጨኒቑዎም ዋጭዋጭ እናበሉ ከለዉ እዩ ብዘይ ዝኾነ መሳርሒ ነቲ ስጉምቲ ብቕጽበት ወሲዱ ነቲ ቆልዓ ኣድሒኑዎ።

እቲ ማሓመዶ ጋሳማ ዝዓየዮ ዓለም ዘዛረበ ጅግንነታዊ ስጉምቲ ኣብ ፈረንሳ ን ጉዳይ ስደተኛታት ዝምልከት ዘተን ክትዕን ከምዘለዓዓለ ዘ ሎካል ዝተባህለ ጋዜጣ ካብ ፓሪስ ሓቢሩ።

ብመሰረት እቲ ሓበሬታ፡ እቲ ኣባላት ፓርላማ ፈረንሳ ነቲ ንናይ `ቁጠባ`፡ ከምኡ `ውን ጉዳዮም ተቐባልነት ዘይረኸበ ስደተኛታት ብቕልጡፍ ንምስጓጒ ዝእምም ኣሻማዊ ዓንቀጽ ኣመልኪቶም ኣብ ዝካትዑሉ ዘለዉ እዋን ዝተኸስተ ፍጻሜ፡ ነቶም ምስ ስደተኛታት ዝደናገጹ ፖለቲከኛታት፡ ` ስደተኛታት ንፈረንሳ ከምዚ ዝኣመሰለ ኣበርክቶ እዮም ዝገብሩላ` ኢሎም ነቶም ጽልኢ ስደተኛታት ዘለዎም የማናውያን ክማጎቱዎም ከለዉ፡ እቶም የማናውያን ብወገኖም፡ እቲ ናይ ማሓመዶ ጅግንነት፡ ነቲ ኣብ ፈረንሳ ዘሎ ቅልውላው ጉዳይ ስደተኛታት መሸፈኒ ክኸውን የብሉን ኢሎም ይከላኸሉ ኣለዉ።

ሓደ ላዕለዋይ ብዓል ስልጣን ናይቲ ኣንጻር ስደተኛታት ዝኾነ ሰልፊ ሃገራዊ ግንባር፡ ዋላ ኳ ማሓመዶ ጋሳማ ዜግነት ፈረንሳ ምቕባሉ እንተደገፈ፡ ኩሎም ካልኦት ስደተኛታት ብጅምላ ክስጎጉ ከምዘለዎም ምግላጹ እቲ ጋዜጣ ይጠቅስ።

በምሰረት ሓበሬታ ማዕከናት ዜና፡ እቲ ቆልዓ ካብ ሞት ኣድሒኑ ዝተሸለምን ዝተመጎሰን ኣብነታዊ መንእሰያት ስደተኛ መሓመዶ ጋሳማ፡ ካብ ኣፍሪቃዊት ሃገሩ ማሊ ቅድሚ ሓያለ እዋን ተበጊሱ፡ ብቡርኪና ፋሶ ናይጀርያ፡ ሊብያ ኣቢሉ ብዘይውሑሳት ጀላቡ በቲ ጽንኩር ናይ ማእከላይ ባሕሪ፡ ዓዲ ጥልያን ድሕሪ ምእታው ኣብ መስከረም 2017 እዩ ብዘይሕጋዊ መንገዲ ፈረንሳ በጺሑ።