ምልካዊ ስርዓት ኢሳይያስ፡ ከም መቐጸልታ ናይቲ ውጽኢት ጸባን ስጋን ንዘፍርዩ ሓረስቶት ቤትመኻእ ከብቶም ካብ ኣስመራ ክወጽኡወን ዘመሓላለፎ ትእዛዝ፡ ጥሪቶም ዘሚቱ ናብ ዒላበርዕድን ኣለቡን ከምዝወሰደን ምንጭታት ካብ ኣስመራ ሓቢሮም።

ልኡኻት ናይቲ ምልካዊ ስርዓት ፈለማ ነቶም ዋናታት ከፈራርሑ ኣብ ደምቢአን ከለዋ ነተን ከብቲ ክሓርዱወን ኳ እንተጀመሩ፡ እቶም ከምብቶም ኣብ ቅድሚ ዓይኖም ክሕረዳ ዝረኣዩ ሰብ ዋኒን መሊሶም ስለዝተነዓዓቡ፡ ሰለስተ ከብቲ ምስ ሓረዱ ነቲ ስጉምቲ ደው ከብሉዎ ከምዝተገደዱ ተፈሊጡ።

ካብኡ ቀጺሉ እቲ ምልካዊ ስርዓት ነተን ብገምጋም ነፍሲ ወከፈን ኣስታት 80 ሽሕ ናቕፋ ዝዋገአን ስቡሓት፡ ዋናታተን ናብ ዒላበርዕድን ኣለቡን ከይዶም 15 ሽሕ ናቕፋ ክወስዱ `ኳ እንተሓበሮም፡ እቶም ዋናታት ኣብ ተቓውሞኦም ብምጽናዕ ንትእዛዝ ናይቲ ስርዓት ከምዘይተቐበሉዎ እቲ ሓበሬታ የረድእ።

ኣብ ዝሓለፈ ዜና ኣሰና ተጠቒሱ ከምዝነበረ፡ እቶም ኣብ ቤትመኻእ ዝርከቡ ሰብ ስታላ “ዓድና እዚ እዩ ናበይ ክንከይድ ደሊኹምና ኢሎም” ምስ ልኡኻት ናይቲ ስርዓት ክከራኸሩ ቀንዮም እዮም።

እቲ ናይ ወሃብቲ ኣገልግሎት ኮነ ተጠቀምቲ ተገዳስነት ዘይብሉ ምልካዊ ስርዓት ኢሳይያስ፣ ብቑዕ ኣገልግሎት መብራህቲ ምቕራብ ስኢኑ ንኸተማ ኣስመራ ምጽልማቱን ንህዝቢ ኣስመራ ግቡእ ቀረብ ዝስተ-ማይ ምሕራሙን ከይኣክል፣ ነቲ ድሮ ጽንኩር ኮይኑ ዝጸንሐ ዋሕዲ ጸባን ስጋን ብኸምዚ ዝኣመሰለ ስጉምቲ ከጋድዶ ምርኣይ ዘቖጥዖም ወሃብቲ ኣገልግሎትን ተጠቀምትን ኣንጸርጺሮም ሕኒን ይብሉ ከምዘለዉ እቶም ምንጭታት ኣገንዚቦም።

እዚ ስጉምቲ `ዚ መቐጸልታ ናይቲ ምልካዊ ስርዓት ኢሳይያስ ኣብ ከባቢ ኣስመራን ካልኦት ከተማታትን ኣባይቲ ብምፍራስ ዘካይዶ ዘሎ ናይ ዕንወት ወፈራ ምዃኑ `ውን ኣሚቶም።