እዚ ሕጂ ንስዑዲ ዓረብያ ዝገዝእ ዘሎ መንግስቲ እንግሊዛዊ ሃጸይነት ንረብሓኡ ዘቖሞ፡ ኣብ’ዚ እዋን እዚ’ከአ ብግዙፍ ለግስታት ወትሃደራዊ ዕጥቅን  ጸጥታዊ ሓለዋን ኣውሮጳን (ብፍላይ መንግስቲ ጀርመንን እንግሊዝን) ሕ.መ.ኣ.ን ዝነብር ሓደ ካብ’ቶም ዝኸፍኡ ኣረሜናዊ ዲክታቶርያዊ መንግስታት ዓለም እዩ።  መንግስቲ ኣሜሪካ ንነፍሱ ከም ሓላዊ ሰላምን ዲሞክራስያን ኣብ ዓለም ክሸይጥ ይፍትን እዩ። እዚ ግን ሓቂ ኣይኮነን። እቶም ካብ 6000 ዘይበዝሑ ንምሉእ ምጣነሃብትን ፖለቲካዊ ስልጣንን ዓለም ዝቈጻጸሩ ሰራሕትን ፈንጣሕትን ንግስነታት ዓለም፡ ብዘይካ ብሕታዊ ረብሓታቶም ሰላምን ዲሞክራስያውን ፍትሕን ዓለም ፈጺሙ ኣይግድሶምን። ንጥቕሞም ዝሰርሕ ሰላምን ዲሞክራስን ግን ይሃንጹ። ንውግእ ሰላም፡ ንዲክታቶርነት ከኣ ዲሞክራስያዊ ኢሎም ክገልጹን ከእምኑን ድማ ኣኽእሎ ኣሎዎም። ንግስነት ስዑዲ ዓረብያ ውጽኢትን ኣገልጋልን ናይ’ዚ ሚስጢራዊ ስልጣን ዓለም እዩ።

ስዑዲ ዓረብያ ሓንቲ ካብ’ተን ዝሃብተማ ሃገራት ዓለም እያ። እንተኾነ እቲ ምሉእ ሃብቲ ሃገርን ዘሰንዮ ፖለቲካዊ ስልጣንን ብካብ 600 ዘይበዝሑ ንጉሳዊ ቤተሰብ ዝተገበተ እዩ። እቲ ዝበዝሕ ህዝቢ ከኣ ካብ ምጽወታ’ቲ መንግስቲ ይነብር። እቲ መንግስቲ ብናይ ስልጣን ዓምጣርነቱን ጭከና ኣብ ልዕሊ ተቓወምቲ ደቂ ሃገርን ካብ’ቶም ዝኸፍኡ ዲክታቶራት ዓለም እዩ።  ብኣሽሓት ዝቍጸሩ ደለይቲ ለውጢ ደቂ ሃገር ብምክፋእ መንግስትን፡ ሽበራነትን- ናይ ሓሶት ክሲ ኣብ ናይ ሓሶት ቤት ፍርዲ- እንዳተኸሱ ኣብ ጨካን ቤት ማእሰርትታት ጠፊኦምን ሓሊቖምን እዮም።  ግፋ መሰል ደቂ ኣንስትዮ ድማ ዘስካሕክሕ እዩ። ኣብ’ታ ሃገር ቕንጣብ እኳ ዲሞክራስያውነት የላን። እንተኾነ እቲ መንግስቲ እቲ እቲ ዝተኸብረን ዝተኣምነን መሓዛ ኣሜሪካን ኣውሮጳን ኣብ’ቲ ዞና እዩ። እዝ’ስ ከመይ? ኣሜሪካን ኣውሮጳን ነቲ ምሉእ ኢፍትሓውን ኢዲሞክራስያን ኣካይዳ መንግስቲ ዓረብ ግርም ይፈልጥኦ እየን እንተኾነ ኣንጻር’ዚ ሓንቲ ቃል’ኳ በጨቕ ኢላተን ኣይትፈልጥን። (እዚ ከኣ ሓደ ካብ’ቲ ንዲክታቶር ኢሳያስ ኣፈወርቂ ዘነድሮ ነጥቢ እዩ። ዓቢዪ ሓወይ ኢሳያስ ተሕዝነኒ ኣብ ሓንቲ’ኳ ዝውሰድ ዘይብላ ድኻ ዓዲ ነጊስካ እምበር ገለ ስትራተጅያዊ ማዕድናት ከም ፐትሮል፡ ኡራንዩም እንተዝነብረናስ ንኸማኻ ዝኣመሰለ ዲክታቶር ከመይ’ከ ኣውሮጳን ኣሜሪካን ኣሚቘን ምሓቖፋኻ! ምሰዓማኻ! ዕድልና ከፊኡ ወይ ጸቢቑ ግን ኦዞም ማዕናት እዚኣቶም የብልናን።)

እቲ ኣብ ልዕሊ ህዝቡ’ኳ ዘስካሕክሕ ጉድኣት ሰብኣዊ መሰላት ዘብጽሐ ድያብሎሳዊ መንግስቲ ስዑድያ፡ ሰብኣዊ መሰላት ወጻእተኛዊ ሰራሕተኛታት ድኣ ከመይ ዘይሕምትል! ምስ’ቲ ኵሉ እትዋታ፡ ኣብ’ዚ እዋን እዚ ህዝቢ ስዑድያ ኣብ ሓማቕ ምጣነሃብታዊ ኵነታት ይርከብ። እቲ ህዝቢ ኣብ ማእቶታዊ ስራሓት ተሳቲፉ ኣይፈልጥን። እቲ መንግስቲ ንእትዋት ፐትሮል ዝትክኡ ካሎኦት ምርጫታት ምጣኔሃብታዊ እትዋት ኣየማዕበለን። ክትዛረበሎም ኣትኽእል ነቲ እንኮኣዊ  ምጣነሃብቲ ሃገር  ክሕግዙ ዝኽእሉ እትዋታዊ ፋብሪካታትን ሕርሻታትን ኣየማዕበለን። እቲ ምሉእ ሃገር ብወጻእተኛታት እዩ ተሃኒጹ። እቲ ወዲ ሃገር ምጽዋት እንዳተደርበየሉ ሰሪሑ ክነብር ኣይተማህረን በዓል ክልተ ጸጋማዊ ኢድ እዩ። ናይ ቤት ስራሕ’ውን እንተኾነ ብሕሱር ስራሕ ወጻእተኛታት እዩ ክስራሕ ጸኒሑ ቅጫ ሰንኪታ ክትበልዕ እትኽእል ስዑድያዊት ሰበይቲ ዘላ ኣይመስለንን። ብዙሓት መንእሰያት ግን ተማሂሮም እንተኾነ ዝሰርሕዎ ስራሕ የሎን። ስእነተ ስራሕ ኣብ መንእሰያት ስዑድያ ሓደ ካብ’ቲ ኣብ ዓለም ዝበዝሐ ኣዩ። ነዚ ቅልውላው’ዚ ንምእላይ፡ ነቲ ጌጋ መንግስቲ ናብ ካልኦት ንምድርባይ፡ መንግስቲ ስዑድያ ሓዲስ ሕገ ስራሕ ኣውጺኡ። ግርም። እዚ ግን ነቲ መሰረታዊ ሽግር ኣይክፈትሖን እዩ። ኣየነይቲ ጓል ስዑድያ እያ ናብ ቤት ካልኦት ስዑድያውያን ከይዳ ቸመንቶ ክትፍሕፍሕ? ኣየናይ ስዑድያዊ መንእሰይ እዩ ናብ ቤት ካልኦት ስዑድያውያን ከይዱ ሞታንታታት ክሓጽብ?

እቲ ብዱዕን ምስሉይን መንግስቲ ስዑድያ ብዱዓትን ምስሉያትን ተጸወርቲ ህዝቢ እዩ ሰሪሑ። እታ ኣብ ልዕሊ ሬሳ እቲ ዝተቐትለ ኢትዮጵያዊ ቈይማ ኣል ከልብ ማት! – እቲ ከልቢ ሞይቱ! ኢላ ዝተሓጎሰት ሰበይቲ ተደንግጽ። እቲ ዝሞተ ንሳ ምዃና ኣይፈለጠትን። እቲ ሓፋሽ ስዑድያዊ ኣብ ልዕሊ ኵሉ ወጻእተኛ- ብፍላይ ኣብ ልዕሊ ጸለምቲ ዘሎዎ ኣሉታዊ፡ ኣስተናዓቒ ርእይቶ ዘንገብግብ እዩ። ኣብ ስዑድያ ቀታሊኦም ዘይፍለጥ ዝቕተሉ ወጻእተኛታት፣ ተዓሚጸን ተቐቲለን ኣብ ፈቐድኡ ዝድርበያ ደቂ ኣንስትዮ ቍጽሪ የብሉን። ሓደ’ኳ ካብ’ቲ መንግስታዊ ትካላት ብዛዕባ ቅትለትን ማህረምትን ወጻእተኛታት ዝግድሶ የሎን። ሓደ ስዑድያዊ ልዑል ንንግዳዊ መሻርኽቱ ፓኪስታናዊ ብህይወቱ ብሓዊ ኣቃጺሉ ቀቲልዎ። መንግስቲ ነቲ ተቐታሊ በገንዘብ ኣሕዊዪዎ እቲ ጉዳይ ናብ ቤት ፍርዲ ከይቀረበ ተሪፉ። ካልእ ልዑል ኣብ ስቪጰራ፡ ኣብ ሓደ ሆቴል ንሓንቲ ሰበይቲ ቀቲሉ እቲ ጉዳይ ናብ ቤት ፍርዲ ከይበጽሐ ብገንዘብ ደቂሱ። ገንዘብ ርግጽ ይገዝእ!

እቲ መንግስቲ ኢትዮጵያ ኣብ ምክልኻል ህዝቡ ዘርኣዮ ተሪር ተቓውሞ ዝነኣድ እዩ። እቲ ኢትዮጵያዊ ከኣ ዝከላኸለሉ መንግስትን ዝምለሰሉ ሃገርን ስለዘሎዎ እቐንእ። ህዝቢ ድማ ተቛዉሞ ኣብ ምሉእ ዓለም ኣብ ዝርከቡ ኤምባሲታት ስዑድያ ከርኢ ኣሎዎ። ኣብ ስዑድያ እንታይ ዓይነት መንግስቲ ይገዝእ ከምዘሎን፡ እንታይ ዓይነት ኣረሜናዊ ህዝቢ ከኣ ከምዝሰርሐን ዓለም ክትፈልጥ ይግባኣ። ኣብ ሃገረ ነቢዪ መሓመድ- እቲ ሰላምን ትዕግስትን ምጽውዋርን ዘምሃረ ነቢዪ፣ ብሓለውቲ እምነቱ ኢና በሃልቲ ምስሉያት ከም’ዚ ዝኣመሰለ ግፍዕን ቅጥለትን ድኻን ስዱድን ክፍጸም ዝኾነ ኣማኒ ክቃወሞ ይግባእ። እቲ ካብ ኵሉ ዘደንግጽ እቲ ወርትግ ኣብ ሞንጎ ሰይጣንን ባሕርን ዝተቐርቀረ ኤርትራዊ እዩ። ዝጣበቐሉ መንግስቲ የብሉን። ናብ ዝምለሶ ሃገር ድማ የብሉን። ኣሎሄ፡ ኣሎሄ ለማ ሰባቕታኒ!? 

ዳንኤል ተስፋይ

16.11.2013

ጀርመን