‘ኣደ መንበር ሃማደኤ ዞባ ኤውሮጳ፡ ወ/ሮ መብራት ሃብቱ ኣብ መወዳእታ፡ ‘ሸሞንተ መጋቢት፡ ኤርትራውያን ደቂ ኣነስትዮ፡ ነቲ ምእንቲ መሰለንን ማዕርነተንን ንምርግጋጽ ዘካይደኦ ቃልሲ፡ ዝግምግማላን ተሳታፍነተን ኣብ ሃገራዊ መደባት ዘረጋግጻላን ዕዝዝቲ ዕለት ሙዃና’ ገሊጻ። ሃማደኤ ዞባ ኤውሮጳ፡ ኣስታት 2500 ኣባላት ዘሎዎ ማሕበር’ዩ።’ ቃል እታ ንነብሳ “ዓቃቢት ሓቂ” እትጽውዕ ብግብሪ ግን ዋላ ሓንቲ መዓልቲውን ትኹን ሓቂ ኣምሊቛ ዘይትፈልጥ ነሳስ ተለቪዢን ህግደፍ።

ኣብቲ መሰልካን ክብርኻን ዝሕለወሉ ሃገር፡ ምስ ህሉው ኩነታት ሃገርና ብምንጽጻር ከኣ ብልምዲ ‘ዓዲ ሰብ!’ ኢልና ንጽውዖ ሃገራት ምዕራብ፡ ብምቾት እናነበርካ፡ ነታ መሰላን ክብረታን ኣብ ሃገራ ስለ ዝተጋህሰ፡ ሃጽ ኢላ ብዘይድሌታ ናብ ስደት ብምውጻኣ፡ ኣብ ጉዕዞኣ መጻወቲ ጓሶት ራሻይዳን በደዊንን ትኸውን ዘላ ኤርትራዊት ጎርዞስ ነቲ ካብ ሃገራ ዘንፈጻ ሰብኣውነቱ ኣጥፊኡ ዘሎ ጉጅለ ምልኪ፡ ብጓይላን ጣቕዒትን ብምድጋፍ፡ መሰላን ማዕርነታን ኣረጋጊጽና ኣለናድየን ዝብላና ዘለዋ እዘን ውሑዳት ካብ ልዕሊ 50 ሽሕ ተቐማጦ ደቂ ኣነስትዮ ኤርትራውያን ኣብ ኤውሮጳ፡ 2500 ዝኾና ቁንጣሮ ንነብሰንውን ዘይውክላ ካድራትን ውሑዳት ደቂ ልቢ ገርሃን ደገፍቲ ጉጅለ ጓይላ!? መልሱ ንልቢ ፋህም (መስተውዓሊ) እገድፎ። በዚ ኣጋጣሚ ግን ነታ ኣብ ኤርትራውያን ሓቐኛ ትርጉማ ስኢና ዘላ ሸሞንተ መጋቢት፡ ናይ መን ከም ዝኾነት ክሓታ ምደለኹ።

ትብዓትክን‘ዩ ኣደታት፡ ዓጋቲ ዘይብሉ

ጸላእቱ ዘርዓደ ኣብ ኲናት ዓሊሉ

ለውሃት ናይ ልብኽን *ደማሒ ኣስተውዒሉ    *መላኺ

*ኣብሊስ ከይሽሕጠክን ከም ወትሩ ኣታሊሉ   *ሰይጣን

ነዚ ምስሉይ *ባልዋ ኣይትዳህለላሉ               *ኣርሓ መፍለስ

ካብ ሃገርና ይጥፋእ ሮዖኡ ጠቕሊሉ          

ንሱ‘ዩ እቲ ሕሰም ጠንቂ ናይዚ ኹሉ!