ብዘይሕጋዊ መንገዲ ካብ ዩክረይን ናብ ኤርትራ ክሰጋገር ተሓሲቡ ዝነበረ 36 ስርሓት ራሻ ናይ ጸረ ኣየር ሚሳይላት ብሰበሰልጣን ዩክረይን ከም እተታሕዘ ላዕለዎት ሲቪላውን ወተሃደራውን ኣኽበርቲ ሕጊ `ታ ሃገር ትማሊ 27 መጋቢት ምግላጾም ኣብ ለንደን ዝመደበሩ janes.com ዝተባህለ ኣብ ጉዳያት ምክልኻል ዘተኩር መርበብ ሓበሬታ ሓቢሩ።

እቲ 5V27D ተባሂሉ ዝፍለጥ ሚሳይላት፡ መርመርቲ ዩክረይን ሚኮላቭ ተባሂላ ኣብ እትፍለጥ ወደባዊት ከተማ ናይታ ሃገር ተፍትሽ እናካየዱ ከለዉ ኣብ ሓደ መኻዚኖ ዝረከቡዎ ምዃኑ ኣብቲ ናይ ኣኽበርቲ ሕጊ ጸብጻብ ተመርኲሱ ይገልጽ።

ብመሰረት እቲ ሓበሬታ፡ እቲ መርመራ፡ ሮዞቦርን  ኤክስፖርት ዝተባህለ መንግስታዊ ትካል ሰደድ ሩስያ ምስ መንነቶም ዘይተፈልጠ ውልቀሰባት ተሓባቢሩ፡ ነቲ ብውድብ ሕቡራት ሃገራት ኣብ ልዕሊ ኤርትራ ጸኒዑ ዝነበረ ኣህጉራዊ እገዳ ኣጽዋር ብምጥሓስ ናብ ኤርትራ ንምእታዉ ተዓሊሙ ዝነበረ እዩ።

ኣቕድም ኣቢሉ፡ ካብ ሰሜን ኮርያ ዝተበገሰ ናይ ወተሃደራዊ ርክብ መሳለጥያታት ብሕቡእ ናብ ኤርትራ ክኣቱ ኣብ ጉዕዞ ከሎ ከምእተታሕዘ ይፍለጥ።