ኣብዘን ዝሓልፋ ሒደት ኣዋርሕ ብጽኑዕ ሓሚሙ ዝጸንሐ ውልቀመላኺ ኢሳይያስ ኣፈወርቂ መጥባሕቲ ብምግባሩ ተኻኢሉ ትማሊ ሰንበት 9 ጥቅምቲ ኣብ ኣስመራ ኣብ ዝተኻየደ ስነስርዓት ቀብሪ ናይቲ ሎሚ ቕነ ዝዓረፈ ቀዋሚ ኣምባሳደር ህግደፍ ኣብ ውድብ ሕቡራት ሃገራት ግርማ ኣስመሮ­­­­­­­­­­ም ክሳተፍ ከምዘይከኣለ ምንጭታት ሓቢሮም።

እቶም ምንጭታት ከምዝሓበሩዎ፣ ኣምባሳደር ግርማ ኣስመሮም ካብ ዝዓርፍ መዓልታት ኣሕሊፉ ክንሱ ሰበስልጣን ህግደፍ ብመራኸቢ ብዙሃን ናይቲ ስርዓት ካብ ምግላጹ ፈለማ ከጽቅጡ ዝፈተኑ፣ ደሓር ‘ውን ብነጻን ናይ ተቓውሞን መርበባት ሓበሬታታትን ራድዮታትን ምስ ተቓልዐ ጸቕጢ ኮይኑዎም ዘዕገሽገሹሉ ምኽንያት፣ ብቐንዱ ምስ ጥዕናዊ ኩነታት ውልቀመላኺ ኢሳይያስ ዝተኣሳሰር ኮይኑ፣ ሞት ኣምባሳደር ግርማ ተፈሊጡ ከምቲ ወትሩ ኣብ ኣጋጣሚታት ሞት ካልኦት ዘዘውትሮ ኣብ ስነስርዓት ቀብሩ እንተዘይተሳቲፉ ነቲ ብወረወረ ንነዊሕ እዋን ክስማዕ ዝቐነየ ሕማሙ ንህዝቢ መረጋገጺ ከይከውን ስለዘሻቐሎም እዩ።

እቶም ንትዕዝብቲ ህዝቢ ኤርትራ ኣስተናዒቖም ዝርእዩዎ፣ ንሕማም ኢሳይያስ ብስቱር ከመሓድሩዎ ድሕሪ ምውርሖም ሞት ኣምባሳደር ግርማ ኣብ ደልሃመት ዘእተዎም ብዱዓት መራሕቲ ህግደፍ፣ ሕሉፍ ሓሊፎም፣ ህዝቢ “ኣብ ቴለቪዥን ርኢናዮ እንዲና” ኢሉ፣ ኢሳይይስ ኣብቲ ስነስርዓት ቀብሪ ዘይምስትፉ ትርጉም ክይህቦ ምእንቲ፣ ቅድሚ ሞት ግርማ ኣስመሮም ምግላጾም፣ ንኢሳይያስ ምስ ተቐዳደምቲ ብሽግለታ ዘርኢ መታለሊ ድራማዊ ዜና ኣብ ቴለቭዥን ከምዘቕረቡ ‘ውን ኣቃሊዖም።

ኢሳይያስ ብጹኑዕ ሓሚሙ ከምዘሎ ቅድሚ ኣዋርሕ ብተደጋጋሚ ሓበሬታ ክበጽሓና ኳ እንተጸንሐ ከምዜና ከነቃልሖ ኣይመረጽናን። ሕጂ ‘ውን እቲ ንሰበስልጣን ህግደፍ ንሞት ኣምባሳደር ግርማ ኣስመሮም ብምስጢር ከትሕዞምን ከዕለብጦምን ዝቐነየ ጉዳይ ግርማ ኣስመሮም ዘይኮነ ብኣውርኡ ኩነታት ኢሳይያስ ምዃኑ ህዝቢ ንኽበርሃሉ ኢና ነልዕሎ ዘለና።

ከምዚ ክብ ኢሉ ዝተጠቕሰ እቲ ንነዊሕ እዋን ብጽኑዕ ሓሚሙ ዝጸንሐ ኢሳይያስ ኣብዚ ቕንያት ‘ዚ መጥባሕቲ ከምዝገበረ ዝበጽሓና ሓበሬታ ዝተረጋገጸ እዩ።