ስርዓት ህግደፍ ኣብ ርእሲ ተዋህዶ ቤተ ክርስቲያን ዝሰርሖ ዘሎ ድራማታት ጭርጭር ዓበደ ናይ ቆልዑ ይቕጽሎ እዩ ዘሎ።

ንፓትርያርክ ኣቡነ እንጦንዮስ ብሞራል ኮነ ኢሉ ንምጉዳእን፥ ህዝቢ ተዋህዶ ከኣ ዝገብሮ የብሉን ዝብል ስንኩፍ ንዕቀትን ምድንጋርን ብመደብ ሓንጺጹ ዝሰርሓሉ ዘሎ ጸይቂ እዩ።

ኣቐዲምና ከም ዝሓበርናዮ 9 መስከረም ብለይቲ ጨውዮም ክወስድዎም ዝረኣዩ ናይ ዓይኒ መሰኻክር ኣረጋጊጾም እዮም። መዓልቲ ቅዱስ ዮውሃንስውን ኣብ ገዛ ከም ዘይነበሩ ሓበሬታ ኣሎ። ድሕሪ እዚ ብመራኸቢ ዝተዘርግሐ ሓበሬታ ናብ ህዝቢ ግን፥ መኣስ ናብ እታ ዝተሓየሩላ ቤት ከም እተመልሱ ኣብታ ቤት ማእሰርቶም ከም ዝተራእዩ  ሓበሬታ በጺሑና ኣሎ። እንተ ኾነ ክሳብ ሕጂ ብኣካል ኣትዩ፥ ክርእዮም ዝኸኣለ የለን። ኣብ ዘይነበሩሉ ግዜውን ፖሊስ ኩሉ ጊዜ ኣብ ኣፍ እቲ ገዛ ንምድንጋር ይሕልዉ ነይሮም እዮም። እታ መግቢ እተቕርበሎም ሰራሕተኛውን ምስኦም ተዓጽያ ኣብ ማሕዩር እያ ዘላ።

እዚ ሕጂ ድሒሩ ዝረኸብናዮ ሓበሬታ፥ ብንጹር ዘይተረጋገጸ ስለ ዝኾነ ኣብ ቀጻሊ ብሩህ ሓበሬታ ከነቕርብ ምዃንናን፥ ህዝቢ ተዋህዶ ሕጂውን እዚ ስርዓት ኣብታ ሃይማኖት ዝፍጽሞ ዘሎ ኣሽካዕላል ኣብ ርእሲ ሽማግለ ኣቦና ምዕገቲ ክገብረሉን ይኣክል ክበሃልን ይግባእ እዩ።

ሓበሬታና ቀጻሊ እዩ ብዓይኒ መርፍእ ኣሕሊፍና እዚ ሓበሬታ ንልእከልኩም ኣሎና።

ደቂ ተዋህዶ ካብ ኣስመራ።