ኣብ ከተማ ለንደን ዓዲ እንግሊዝ ዝርከቡ ሰብ ሕልና ኤርትራውያን ደለይቲ ፍትሒ፣ መበል 14 ዓመት ማእሰርቲ ናይቶም ኣብ ኤርትራ ደሞክራስያዊ ለውጢ ክተኣታቶ ብዘቕረቡዎ ጻውዒት ኣብ ምስጢራዊ ቦታ ተሓይሮም ዝሓቁ ዘለዉ ፖለቲከኛታትን ጋዜጠኛታትን ኤርትራ ምኽንያት ብምግባር፣ ሎሚ ንጉሆ 18 መስከረም ‘ውን ነቲ ትማሊ ኣብ ቅድሚ ኤምባሲ ምልካዊ ስርዓት ኢሳይያስ ዝጀመሩዎ ናይ ዝኽሪ ስነስርዓት ቀጺሎሞ።

እቶም ከም ትእምርቲ ናይቶም ተመቝሖም ዘለዉ ኤርትራውያን ኣሓትን ኣሕዋትን ኣእዳዎም ሰንሰለት ተኣሲሮም ኣብቲ ናይ ዝኽሪ ሰልፊ ዝተሳተፉ ግዱሳት፣ ኣብ ፊት እቲ ኤምባሲ ኣብ ዝርከብ ሰፊሕ መንደቕ ምስልታት ናይቶም እሱራት ፖለቲከኛታት፣ ጋዚጠኛታትን መራሕቲ ሃይማኖትን ዘርኢ ብብዝሒ ፖስተራት ብምጥቃዕ እዮም ነቲ ናይ ዝኽሪ መደብ ጀሚሮሞ።

እቶም ስለ ናጽነት ኤርትራ ንእስነቶም ዘወፈዩ ጀጋኑ ነጻ ክልቀቑ፣ ምልካዊ ስርዓት ኢሳይያስ ካብ ስልጣን ክምሖ፣ ኣብ ኤርትራ ልዕልና ሕጊ ተረጋጊጹ ፍትሒ ክነግስ ድማ ብጭርሖታትም ጸዊዖም።

ኤምባሲ ምልካዊ ስርዓት ኢሳይያስ፣ እቲ ናይ ዝኽሪ መደብ ክካየድ ምዃኑ ወግዓዊ ብምንባሩ ብንጉሆኡ ኣፍደጊኡ ዝሕሉዉሉ ፖሊስ ኣዋዲዱ ኣርፊዱ።

ነቲ ንኽልተ መዓልቲ ዝቐጸለ ዝኽሪ ዝወደባ ኣብ ዓዲ እንግሊዝ ተወሊደን ዝዓበያ ክልተ ናእሽቱ መንእሰያት፣ “ዋላ ‘ኳ ታሪኾም ብዛንታ ጥራይ ንፈልጦ እንተኾና፣ ጅግንነቶምን ተወፋይነቶምን መታን ከይርሳዕ፣ ነቲ ቅድሜና ዝጸንሐ ናይ ምዝካሮም ያታ ክንቅጽሎ ሓላፍነት ኣለና ክብላ ንድምጺ ኣሰና ቃለን ሂበን። ህዝቢ ኤርትራ ጀጋኑኡ ከኽብር ድማ ጻውዒተን ኣቕሪበን።