እቶም እስራኤላውያን ዶክተራት ብሰንኪ እዚ ስደተኛታት ናይ ምስጓጒ ውጥን ምስ መንግስቲ እስራኤል ጥራይ ዘይኮነ እንተላይ ምስ ሚኒስትሪ ጥዕና እታ ሃገር `ውን ከምዘይተቓደዉ ተፈሊጡ።

ብመሰረት እቲ ሓበሬታ፡ ዝሓለፈ ሰሙን፡ ማሕበር ሓካይም ንሰብኣዊ መሰላት ኣብ እስራኤል፡ ፕሮፈሰር ሽሎሞ ሞር-ዮሰፍ ንዝተባህለ፡ ኣብ ሚኒስትሪ ውሽጣዊ ጉዳያት እስራኤል ከም ሓላፊ ኢሚግሬሽንን ናይ ዶባት ብዓል መዝን ዝሰርሕ፡ ነዚ ንኤርትራውያንን ሱዳናውያንን ስደተኛታት ንምስጓጒ ዝካየድ ዘሎ ወፈራ `ውን ዝመርሕ ዘሎ ብዓል ስልጣን ናይ ሕክምና ልቸንሳኡ ክስረዝ ጠሊቡ። እቲ ጥርዓን ናይ ማሕበር ሓካይም እስራኤል፡ እቲ ብዓል ስልጣን ከም ሓኪም መጠን ምስ ሞያዊ ስነምግባሩ ዘይቃዶ ንጥፈታት የካይድ ምህላዉ፡ ነቲ ሞያ ብሓፈሻ ዝብክል ስለዝኾነ ልቸንስኡ ክሕደግ ኣለዎ ክብል ተማሕጺኑ።

ብዘይካ`ዚ፡ ሓደ ሽሕ  ዝኾኑ ዶክተራት እስራኤል፡ ፕሮፈሰር ሽሎሞ ሞር-ዮሰፍ ነቲ ተወጢኑ ዘሎ ምስጓጒ ኤርትራውያንን ሱዳናውያንን ስደተኛታት ደው ከብሎ ኣብ ዝጽውዕ ደብዳበ ብምፍራም ነቲ ስጉምቲ ደው ንምባል ስጉምቲ ወሲዶም።

ንሳቶም ኣብቲ ደብዳቢኦም፡ ` ስቕታና፡ ነቲ ስብኣውነት ኣብ ታሪኹ ካብ ዝረኣዮም መረርቲ ጽፍዒትታት ስቕ ኢልካ ከም ምቕባል እዩ` ብምባል ነቲ ስደተኛታት ንምስጓጒ ተወጢኑ ዘሎ መደብ ክቕበሉዎ ሕልናኦም ከምዘየፍቅደሎም ኣብ ደብዳቢኦም ገለጺጾም። መንግስቲ እስራኤል፡ ነዚ ሽግር `ዚ ሞራላውን ሰብኣውን ፍታሕ ብምርካብ፡ እቶም ስደተኛታት ናይ ጥዕና መሰልን ሰብኣዊ ክብረትን ዝረኽቡሉ ኩነታት ክፈጥር ድማ ተማሕጺኖም።

በንጻሩ ምኽትል ሚኒስተር ጥዕና እስራኤል ያኮቭ ላቲዝማን፡ ነቶም ዝቃወሙ ዘለዉ ዶክተራት ኣብ ዝሃቦ መልሲ፡ ንውልቅኻ ጥራይ ተሸቚራሪ ሰብኣውነት መሲልካ፡ መንግስቲ እስራኤል ነቶም ወጻእተኛታት ብጭካነ ይሰጎም ከምዘሎ ብምምራር መሰረት የብሉን ድሕሪ ምባል፡ ኣብ ዘየእትዎም ጉዳይ መርገጺ ምውሳዶም ግጉይ ምዃኑ እቲ ምዝራቡ እቲ ዜና ብተወሳኺ የገንዝብ።

ማሕበር ሓካይም እስራኤል ንርኢቶ ምኽትል ሚኒስተር ጥዕና ደጊሞም ኣብ ዝሃቡዎ ምላሽ ድማ፡ ` ነቶም ተቓውሞ ዘርኣዩ ሓካይም ከተቆናጽቦም ምፍታኑ፡ ነቲ ንዝኾነ መንግስታዊ ፖሊሲ ንዝተቓወመ ወገን ብኣሉታ ገሊጽካ ኣብ ኩርናዕ ንምእታው ዝተለምደ ዝምባለ መንግስቲ እስራኤል ዘርኢ ተወሳኺ ስጉምቲ ምዃኑ ብምጥቃስ፡ መንግስቲ፡ ንሕመረት ክብርታት ሕክምናዊ ሞያ ዝጻባእ ስጉምቲ ኣብ ዝወስደሉ ግዜ ተቓውሞኦም ምርኣይ ተኣማምምነቶም ሕሙማቶም ዘርእዩሉ እቲ ዝቐነዐ ሞያውን ሞራላውን ግዴታኦም  ምዃኑ ደጊሞም ኣረጋጊጾም።

ኣብ ዝሓለፈ ቅንያት ፓይሎታት እስራኤል `ውን፡ ስደተኛታት ናብ ኣፍሪቃ ብምብራር ኣብቲ መንግስታዊ  ናይ ምስጓጒ ፖሊሲ ከምዘይተሓባበሩ ብምግላጽ ብተመሳሳሊ ተቓውሞኦም ምግላጾም ይፍለጥ።

እዚ ሰብ ሞያ እስራኤል፡ ማለት ፓይሎታት፡ ሓካይምን ተጣበቕቲ ሰብኣዊ መሰላትን፡ ካብቲ ዘይቅኑዕ ፖሊሲ መንግስቶም ንሞያዊ ክብርታቶም ተማእዚዞም ኣብ ጎኒ `ቶም ውጹዓት ኤርትራውያንን ሱዳናውያንን ስደተኛታት ዝወስዱዎ ዘለዉ ሞራላውን ሰብኣውን መርገጺታት ኣብነታዊ እዩ።

 
Subscribe ASSENNA YouTube to get Radio Assenna shows on time: