እቲ ስርዓት ኢሳይያስ፣ ሓንሳብ ናይ ኣፍሪቃውያን ሓንሳብ ናይ ቀርኒ ኣፍሪቃውያን እናበለ ክሓባብኦን ክነነኣእሶን ዝቐነየ ኣብ ልቢ መላእ ህዝቢ ኤርትራ ከቢድ ቁስሊ ፈጢሩ ዘሎ 360 ዜጋታት ዝቐዘፈ ትራጀዲ ላምፐዱዛ እንተላይ ንሰበስልጣን ናይቲ ምልካዊ ስርዓት ብቐጥታ ተንኪፉዎም ከምዘሎ ምንጭታት ካብ ኣስመራ ሓቢሮም።

ብመሰረት ‘ቲ ሓበሬታ ሓደ ካብቶም በዚ ዘሕዝን ፍጻሜ ብቐጥታ ተተንኪፎም ዘለዉ ሰበስልጣን፣ ወዲ ሓወቦኣ ነታ ኣማውታኣ ንኤርትራውያን ጥራይ ዘይኮነ ንዓለም ‘ውን ዘሰንበደ ምስ 3 ንጹሃት ዕሸላት ደቃ ዝጠሓለት ኤርትራዊት ኣደ ሄለን ከበደ፣ ሓላፊ ትምህርቲ ካድር ስርዓት ኢሳይያስ ኣቶ ኣሕፈሮም ተወልደ እዩ። ኣዲኣ ኣብ ወጻኢ ስለእትርከብ፣ እቲ ናይ ኣስመራ ሓዘን ኣብ ቤት ኣቶ ኣሕፈሮም ተወልደ እዩ ዝግበር ዘሎ። በቲ ሓደጋ ከም ኩሉ ኤርትራውያን ናይ ቀረባ ቤተሰብን ኣዝዩ ሓዚኑ ከምዘሎ ድማ ይፍለጥ።

ይኹን’ምበር፣ ሰበስልጣን ስርዓት ኢሳይያስ ገሊኦም ብቐጥታ ተተንኪፎም፣ ገሊኦም’ውን ናብቲ ፈቖድኡ ተተኺሉ ዘሎ ዳሳት ሓዘን እናበጽሑ ከለዉ፣ ቴለቭዥን ናይቲ ስርዓት፣ ብዛዕባ ኣብ ቻይና ዝሞቱ ክልተ ሰለስተ ሰባትን ኣብ ጎልጅ ዝተኸትባ ኣባጊዕን ከተውሪ ምስማዕ ክጻወሩዎ ከለዉ፣ ምእንቲ ስልጣን ክሳብ ክንደይ ሕልናኦም ሸይጦም ከምዘለዉ ዘመልክት እዩ።

ብሰንኪ ክሕደትን ውዲታዊ ምምሽጣርን ስርዓት ኢሳይያስን መንግስቲ ጥልያንን፣ እቲ ኣብ ውሽጢ ሃገር ኣትዩ ንቡር ሓመድ ድበን ክብርን ክረክብ ዝነበሮ ምስኪነይቲ ነፍሲሄር ሄለንን ዕሽላት ደቃን ዝርከቦዎም ናይ 360 ሞት ኤርትራውያን በብጉጅለ ኣብ ቺቺልያ ተዛሕዚሑ ተቐቢሩ ‘ሎ።