ካብ ዝተፈላለያ ሃገራት ኤውሮጳ ናብ ጀርመን ዝወሓዙ ኤርትራውያን ደለይቲ ለውጢ ፡ ኣብ ከተማ ጊሰን ንውልቀምልካዊ ስርዓት ህግደፍ ዝዅንን ውዕዉዕ ሰላማዊ ሰልፊ ከም ዘካየዱ እቲ ሰላማዊ ሰልፊ እናተኻየደ ኸሎ ምስ ድምጺ ኣሰና ብቐጥታ ኣብ ዘካየዱዎ ዝርርብ ሓቢሮም።

እቶም ኣብ ውሽጢ ሳልስቲ ብዝተገብረሎም መጸዋዕታ ካብ ስዊዘርላንድ፡ ሽወደን፡ ሆላንድ ዓዲ ጥልያንን ንሓያለ ሰዓታት ብመካይን ተጓዒዞም ኣብ ጀርመን ምስ ዝጸንሑዎም  ደለይቲ ለውጢ ተጸምቢሮም፡ ሰላማዊ ሰልፊ ዘካየዱ ልዕሊ 700 ኤርትራውያን፡ እቲ ናይ ሎሚ ሰልፊ ብዓይነቱን ኣወዳድባኡን ዝተፈልየ ምንባሩ፡ ንናህሪ ተቓውሞ ናይቲ ኣብ ዝሓለፈ ሰሙን ኣብ ኒውዮርክ ዝተኻየደ ሰልፊ ተቓውሞ መሊሱ ንቕድሚት ከምዝደረኾ ኣገንዚቦም።

እቲ ሰላማዊ ሰልፊ፡ ብኣምባሳደር ስርዓት ህግደፍ ኣብ ጀርመን ብታሕቲ ታሕቲ ዝተዓደሙ ቀንዲ ደገፍቲ ‘ቲ ስርዓት፡ ካብ ኤርትራ ብዝመጹ ደረፍቲ ኣብ ወጋሕ ትበል ለይቲ ክሓድሩ ኣብ ዝኣትዉሉ ዝነበሩ መሰ ሃለ ዝተባህለ ኣዳራሽ እዩ ተኻይዱ።

እቶም  ካብቲ መወዳእታ ዘይብሉ፡ ንመንእሰያት ከም ገላዩ ብዘይደረት ዝቐየደ ኣገልግሎት ስርዓት ህግደፍ ኣምሊጦም ኣብ ዝተፈላለያ ሃገራት ኤውሮጳ ተሰዲዶም ብዘለዉ መንእሰያት ተዓብሊሉ ዝነበረ ሰልፊ ተቓውሞ ናህርን ቁጥዐን ‘ውን ከምዝነበሮ፡ ነቶም ስቓይ ህዝቦም ዕሽሽ ኢሎም ምስ ልኡኻት ዲክታተር ክድንሱ ዝኸዱ ዝነበሩ ኤርትራውያን ዘሕንኽ ከምዝነበር ‘ውን እቶም  ተሳተፍቲ ሓቢሮም።

ምሉእ ትሕዝቶ ናይቲ ሎሚ ኣሰና ምስ ተሳተፍትን ወደብትን ናይቲ መደብ ዘካየደቶ ዝርርብን ሃዋህው ናይቲ ሰላማዊ ሰልፊ ዝገልጽ ጸብጻብን ኣብ ናይ ጽባሕ ሰኑ መደብና ተኸታተሉ።