(ብመቀየሲ ሸኽ ከቢረ)

ብ ኣወልኼር ዓ/ሓፊዝ

ምዕራባውያን፡ ብምትሕብባር ጓሓሉ ደቀ-ባት፤ ብባርነት ዘገልግል ዝጓረትዎ ኣፍሪቃዊ ሓይሊ ሰብ    ከይኣክል ፤   ነቲ ኣፍሪቃዊ መሬት ከኣ በብዘርከቡሉን ብሓይሎም ዝሃቦምን ፤ናይ ደቂ ሰብ ስሚዒትን  ማሕበራዊ  ምትእስሳርን  ኣብ ግምት ከየተዉ ጎዛዚዮም  ምስ መቃቀልዎ  ፤ እቲ ክፉት ዝምድና ኣህዛብ ተደሪቱ ፤ ብዘይ ባህርያዊ  ኣታዓባብያ  ዶብ ዘለወን ቁሱላት ሃገራት ተፈጥራ።

ንጂኦ ፖለቲካ ምርኩስ ብምግባር “ ሃገር” ኢልካ ምዝራብ እምበኣር  ካብዚ`ዩ ዝጅምር ።ቅድሚ ምዕራባዊ መግዛእቲ ዝጸነሔ ኸኣ ናይ መሳፍንትን ሸፋቱን እትው ውጽእን ዝምታን  ወረራን ጥራሕ`ዩ። ስለዚ ሃጠውቀጠው ታሪኽ ኣሸሓት ዓመታት`ዶ ነገስታትና`ዶ ዝብል ገለጻታት ዝወጸሉ ፋልሶ`ዩ።

እዘን ብኸምዚ ዝቆማ ቁሱላት ሃገራት ኣፍሪቃ ድሕሪ ናጽነተን`ውን መብዛሕተኤን ብኢድ ኣዙር መግዛእቲ /ብ ባምቡላታት ደቂ ሃገር/ ክምራሓ ስለ ዝጀመራ ፤ ካብቲ ዝነበረኦ ጸላም ክወጻ ኣይከኣላን ጥራሕ ዘይኮነ  ዳሓረን ዝገደደ ይበዝሓ።

ዝኾነ  ዝተቀልቀለ ሃናጺ ኣፍሪቃዊ ኣእምሮ ኸኣ  ኣደዳ ማእሰርትን ቅንጸላን ኮይኑ፤ እቲ ዝተረፈ ኸኣ ፤ ንስደት ኣምሪሑ ነነባብርኡ ምስቲ ናይ ምዕራብ ቅርጺ እናቃደወ፤ ናይ ግሉ ናብራ  ምምሕያሽ ጥራሕ ከም ዝሓስብ ተገይሩ`ዩ።

ሕጂ ኸኣ ከም ዶ/ ኣብየ ኣሕመድ ዝኣመሰለ ሙሁር ሰብ ፤ንቅርኒ ኣፍሪቃ  ሓደ ንምግባር ክብገስ እንኮሎ ፤ ከም ሓሳብ ክድገፍን ክሰፍሕን  ክጻዓረሉን ዘለዎ ጉዳይ`ኳ እንተኾነ ፤ ንኸምዚ ዝኣመሰለ ዓቢ ዕማም ክማላኣሉ ዝግባእ በዓል ቤታውን ወድዓውን ሮቋሒታት ረሲዕካ ኣይኮነን።

ኣብ ዘይረሰነ ሞጎጎ ዝተኸሰ ብሑቅ ጣይታ ኮይኑ ክወጽእ ኣይክእልን`ዩ። ምልስ ኢልና ናይቲ ጥረ እኽልን ምጥሓኑን፤ ሕልፍ ኢልና ኸኣ ናይ ኣከፋፍልኡን ኣበላልዕኡን ሕቶ`ውን ኣሎ ።

ዝኾነ ኾይኑ ውህደት ኣህዛብ ንምንታይ ይድለን ረብሓታቱን ክንርኢ ኮና፤ ንግለ ሰብ ንርኤ፤ ወዲ ሰብ ከም መሰረት  ከብዱ ክመልእ የገደሶ ኤኮነሚ ማለት`ዩ፤ ምስዚ ዝተተሓሓዘ ኸኣ ጸጥታኡ የገድሶ፡ ሃገራት ከኣ ልክዕ ከምኡ`የን።

ሓንቲ ሃገር ንናይ ሓንቲ ካልእ ሃገር ህዝቢ ካብ ዘለዋ ጸጋ ንኸተካፍላ ትዕድም ሃገር የላን። እንተዝከኣል ብወገነይ ኣይምተጸልኤን እብል። ግና ብሱሩ እቲ ጉዳይ ከምቲ ናይ ዘመን እኒእኒ`ዩ፤ ስርናይ ክህበካ ጨው ሃበኒ፤ መህደኒ እስርሓልካ ሓንቲ ጠል ትህበኒ …………   ወዘተ

ዝኾነ ኾይኑ ንዓይ እታ “ ርስንቲ ሞጎጎ’ ጉዳይ ፍትሒ ምዃና`ያ፤ ከምኡ`ውን ንስዉእ ሽኽ ዓብደልቃድር ከቢረ።

2ይ ውግእ ዓለም ኣብቂዑ፤ ኣብ መግዛእቲ ዝነበራ ይለቀቃ ምስ ተባህለ ፤ሓጹረን ፈሊጠን ባንደራ ከውለብልባ እንኮለዋ ፤ ናይ ኤርትራ ነጻ ምውጻእ ዘይተዋሕጠሎም ምዕራባውያን ከኣ ምስ ኢትዮጵያ ንኽጽንብሩዋ ክፈትሉን ክኣልሙን ጀመሩ።

ኣብዚ ግዜ`ዚ  ሓደ ካብቶም ናይቲ እዋን`ቲ  ሙሁራት፤ ናይ ዓለምና ኣሰራርሓን ሽርሒታትን ዝርድኡ ፤ ኣብ ናይ ዓለም ድፕሎማሲ  ዝተዋስኡ በዓል ሃብቲ፤ ኢትዮጵያ ብብዙሕ መንገዲ ክትጥብሮም ፈቲና ዘፍሸልዋ ፤ ሸኽ ዓብደልቃድር ከቢረ  ነዛ ተጸንበርዋ ዝበሃል ዘሎ ኢትዮጵያ ብዓይኒ ምስክርነት ርእዮም መዚኖም ንኽውስኑ ካብ ኣስመራ ነቂሎም ንኢትዮጵያ ዘይሮም ተመልሱ።

……….. እዚ ኣብ ከበሳታት ብርስትን ደሳን ብዓድን ብስድራን መሬቱ ወኒኑ፤ ነ 40 ዓመት ዝተጸገዖ ሰብ ዘማእክል፤ ኣብ ቆላታት ከኣ ብናይ ሓባር ውነና ብነጻ ዝጓሲ ህዝቢ፤ ምስ ብመሳፍቲ መሬቱ ተወኒኑ ተጸጊዑ ዝነብር ህዝቢ ኢትዮጵያ ……… ኮታ  “ ህዝቢ  ኢትዮጵያ ኣብ ባርነትን ድኽነትን ሕስረትን ተረጊጹ ዝነብር ዘሎ  ህዝቢ`ዩ። ኢትዮጵያዊ ኣስላማይ ከኣ  ኣብ ርእስ`ቲ ከም ኢትዮጵያዊ ዝወርዶ ግፍዒ ብስንኪ እምነቱ ዝወርዶ ተደራቢ ግፍዒ ኣሎ ። ………..  ምስ ኢትዮጵያ ምጽንባር ጌጋ`ዩ”

እዚ መደምደምታ ከቢረ ፤ ነቲ ዝተተኮሰ ቃልስን ነቲ ንሶም ዝፈለምዎ መስዋእትን ክብርን  ሓረበኛነትን ነጻነትን ልኡላውነትን  መሰረት ዝኾነ ፤ ብዓብዩ ኸኣ 3 ሚልዮን ኣንጻር 50 ሚልዮን ፤ ቅንጹብ ናይ ገለ ሃገራት ኣዕራብ ደገፍ ኣንጻር ኣመሪካዊ  ሶቭየታዊ ኩባዊ እስራኤላዊ ምስራቅ ጀርመን  ደቡብ የመን ገጢሙ ክስዕር ዝገበረ ሓያል መሰረት`ዩ።

ትብዓት፡ ናይ ምምዳር ዓቅሚ፡ ተወፋይነትን ልግስን ኣስራርዓን ከቢረ  ኣብቲ ግዜ`ቲ ኮንካ ብመስዋእቶም ጀሚሩ ብነጻነት ክድምደም ንኽትግምት ዘጸግም ነይሩ ክኸውን ይኽእል`ዩ

ናብ ሸቶኻ ዘብጽሕ ቅኑዕ ኣካይዳ ጥራሕ`ዩ። ናብ ህንዲ ዝበጻሕካ መሲሉካ ንዘይ ህንዳውያን ህንዲ ምባል`ውን ኣሎ።

AAHfiz (134 ) 21/07/2018