ገማግም ባሕርና ናይ ሃገርን ህዝብን እዩ ተባሂሉ ንዝኾነ ወጻእተኛ ይኹን ወዲ ሃገር ኣውፋሪ ንልዕሊ 20 ዓመታት ተሓሪምዎ ጸኒሑ’ዩ። ሕጂ ንሆቴላት መሬት ክወሃበኩም ስለዝተበሃሉ ኣብ ባጽዕ መሬት ንኽወሃቦም ከምኡ’ውን ኣብ ኣስመራ መሬት ተዋሂቦም ሆቴላት ንኽሰርሑ ዝሓቱን ዝሸባሸቡን ዘለዉ ውሑዳት፡ ኩሎም ተዓሽዮምን ተጋግዮምን ክበሃል ምስተኻእለ፡ ግና ዝበዝሑ ዕሱባት ህግደፍ፡ ብዓብይኡ ኸኣ ናይ ሰብ መዚ ህግደፍን ጀነራላትን ርእሰማል ኣብ ሃገራት ኣፍሪቃ ዘዋፍሩ ዘለዉ እዮም።ናይ ውልቀ ሰባት ዝተሃገረን ዝተመንዝዐን ትካላትን ፋብሪካታትን፡ ንነዊሕ እዋን ብኤርትራውያን ክውነን ዝጸንሐ ሆቴላትን ህንጻታትን ንኽሽየጥ፡ ናይ ደቂ ሃገር ዋንንነት ዘለዎ መሬትን፡ ኣብ ኣስመራ ዝርከብ ኣብ ትሕቲ መንግስቲ ዘሎ ናይ ህዝቢ መሬትን፡ ተዓዲጉ ንኽስራሕ ብህግደፍ ተሓንጺጹ ኣሎ።

እዞም ኣብ ደገ ዝነብሩ ናይ ህግደፍ ዕሱባትን ተወከልትን ኣብ ሓጺር እዋን ኣን ኣንጎላ፡ ጁባ፡ ኮንጎን ካልኦት ሃገራት ኣፍሪቃ ብዘጥረይዎ ገንዘብ ተመሊሶም ኣብ ኤርትራ ከም ቅኑዓትን ንጹሃን ኣውፈርቲ ተመሲሎም ንኸውፍሩ ተበጊሶም ዘለዉ፡ ኣበገስቶምን መወልቶምን ሰበ ስልጣንን ጀነራላትን ዝኾኑ ከም ብዓል እንዳ ቐሺ እዝራ (ልኡኻትን ኣውፈርትን ናይ ጀነራል ተኽላይ ማንጁስ)፡ ምሕረትኣብ ዓዲቐይሕ (ልኡኽ ህግደፍ) ከምኡ’ውን ካልኦት ሓደስቲ ሰብ ርእሰ ማል፡ ኣብ ሓጺር እዋን ዘይተኣደነ ገንዘብ ህዝቢ ዝመንዝዑ፡ ኣብ’ዚ ናይ ሓሶት ድራማዊ ወፍሪ ናይ ህግደፍ ንኸምስሉን ንኻልኦት ከጋግዩን፡ ናይ እንዳ’ማቶም ትካላትን፡ ናይ ህዝቢ መሬትን ንኽገዝኡ ይህንደዱ ኣለዉ። ንኸምስሉ ኣብ ኣኼባታት ተኣፈፍቲ ዝመስሉ ግና ጸሓይ ዝወቕዖም ሕቶታት ወስ እንዳበሉ ንግዚኡ ውሑዳት ከጋግዩ ክኢሎም ኣለዉ። በዚ ድራማ ዝተታለሉ፡ ስጋብ ሕጂ ኣስታት 60 ዝጽግዑ ኤርትራውያን ኣውፈርቲ መሬት ሃቡና ሆቴል ክንሰርሕ፡ ዝስየጥ ፋብሪካ እንተሎ ክንገዝእ እንዳበሉ ናብ ወልዳይ ፍጡርን ሚኒስተር ኢንዱስትሪ እስቲፋኖስን ይመላለሱ ኣለዉ።

ንያላ ሆቴል፣ ኣምባሳደር ሆቴል፣ እንዳ ኣልፋ ፋብሪካ ባኒ፣ ትካል ፍርያት ጸባ (እንዳ ኣቺ) ከምኡ’ውን ካልኦት ብዙሓት ትካላት ብስርዓት ህግደፍ ትካላት ንብሕታውነት ምስግጋር ተባሂሉ ተሸይጠን ከብቅዓ፡ እንደገና ብዘይ ዝኾነ ምኽንያት ዝተሃገራ፡ ብደቂ ሃገር ዝውነን ኣብ ማእከል ኣስመራ ዝርከብ መሬትን ንኽገዝኡ ዝዋደዱ ዘለዉ ዕሱባት ህግደፍ ጽባሕ ብሕጋውያን ወነንቲን ብህዝብን ብመጻኢ መንግስትን ተሓተቲ ሙኻኖም ክግንዘቡ ይግባእ።

ኣብ’ዚ እዋን ስርዓት ህግደፍ ብቑጠባዊ ምዳያቱ ትልኽ ኣብ ዝብለሉ ዘሎ እዋን ብዝኾነ ይኹን ዓይነት ወፍሪ ወይ’ውን ናይ ወጻኢ ባጤራ ናብ ናይ ህግደፍ ካዝና ዘእተወ ንህግደፍ ሂወት ምስኳዕን ዕድመ ምንዋሕን ስለ ዝኾነ ብስቓይን መከራን ናይ ህዝቢ ኤርትራ ከም ዘሽካዕለለ ኮይኑ እዩ ዝርአ። ስለዝሖነ ኸኣ ዝኾነ ይኹን ኤርትራዊ ኣብ’ዚ ወፍሪ ዝተዋስአ፡ ዝባሕ መሬት ምስወግሐ፡ ብህዝብን ብዝመጽእ መንግስትን ተሓታቲ ሙኻኑን፡ ዝኸፈሎ ገንዘብ ድማ መጻኢ መንግስቲ ዘይሕተተሉ ሙኻኑ ክፍለጥ ኣለዎ።

ነባሪ ህዝቢ እምበር ነባሪ መንግስቲ የለን!

ካብ ግዱሳት ተጋደልቲ

ኣስመራ