ትማሊ ቀዳም ዕለት 29 ሰነ 2013 ካብ ፖሊቲካውን ብርገሳውን ውልቀስባትን ዝተሳትፍዎ  ሰፊሕ አኼባ ኣብ ከተማ ስቶክሆልም ተሰላሲሉ፣እቲ አኼባ ኣገደስቲ እዋናውያን ሕቶታት ብኩነታት ሕዝቢ ኤርትራ ብሓፈሻ፣ ብፍላይ ድማ በቲ ኣብ ከተማ ስቶክሆልም ካብ 25-28 ሓምለ 2013 ክግበር ተወሲኑ ንዘሎ ፈስቲቫል እንታይነቱን ዕላማኡን ንመንግስቲ ሽዊደን ንምግላጽን፣ ነቲ በዚ ብኣፍልጦ ወይ ብዘይ ኣፍልጦ ኣብዚ ፈስቲቫል ዝሳተፍ ኤርትራዊ-ስዊደናዊ ድማ ኣብዚ ፈስቲቫልዚ ምስታፍ ረሳታት ሕዝቢ ኤርትራ ምርጋጽን፣ንዕቀት ሕዝቢ ኤርትራ ምዃኑን፣ በቲ ስርዓት ዝካየድ ዘሎ ናይ ሕዝቢ ኤርትራ ምጽናትን ስቅያትን እውን ተሓተቲ ምዃኖም ንምግላጽ፣ ሓደ ዓቢይን ሰፊሕን ሰላማዊ ሰልፊ፣ ከካይድን፣ ነቶም ነዚ ፈስቲቫል ቦታ ዘካርዩ ሰበ ስልጣን ስዊደን ድማ እዚ ፈስቲቫል እዚ ብመሰረት እቲ ብሕቡራት ሃገራት- ጸጥታ በት ምኽሪ ውሳነታት 1907/2009ን 2023/2011 ክቅየዱን፣ ነዚ ከምዚ ዓይነት ፈስቲቫላት ምስቲ ግብረ-ሽበራ ናይ ምምዋል ዝተኣሳሰረ እምበር ንዕብየት ባህልን ልምድን ሕዝቢ ኤርትራ ከምዘይኮነ፣ ብኩሉ ሕጋውን ፖሊቲካውን ሸነኻቱ ተራእዩ፣ ኣብ ሃገረ ስዊደን እውን ደው ከምዝብል ንምግባሩ ክሰርሕ ምዃኑ እቲ ኣኼባ ወሲኑ።

አኼባ ነዚ ውሳነታት ኣብ ግብሪ ተውዕል ብ8 ኣባላት ዝቆመት ኮሚተ ሰላማዊ ሰልፍታትን፣ እማመታት ናብ መንግስቲ ስዊደን ተቅርብን ትከታትልን መሪጹ። ንስራሓታን መደባትን ድማ ምምርሒ ኣውጺኡ።

ኣዋሃሃዲት ኮሚተ /ጽላል ፖሊቲካውን ብርገሳውን ማሕበራት ኣብ ከተማ ስቶክሆልም