ሰራዊት ዚምባብወ ንዋና መደበር ቴለቭዥን ዚምባብወ ከምኡ `ውን ቤተመንግስቲ ዝርከቡዎም ኣገደስቲ መንግስታዊ ትካላት `ታ ሃገር ብምቊጽጻር ንፕረዚደንት ዚምባብወ ሮበርት ሙጋበ ኣብ ቀይዲ ከምዘእተዎ ዝተፈላለያ ማዕከናት ዜና ይሕብራ ኣለዋ።

ብመሰረት `ቲ ካብ ዚምባብወ ዝወጽእ ዘሎ ሓበሬታታት፡ ሰራዊት ዚምባብወ ትማሊ ምሸት 14 ሕዳር ኣብ ሃገራዊ ቴሌቪዥን ቀሪቡ ኣብ ከባቢ `ቲ ፕረዚደንት ንዘለዉ ገበነኛታት ንምጽራይ ነታ ሃገር ንግዚኡ ኣብ ትሕቲ ቁጽጽሩ ኣእትዩዋ ከምዘሎ ድሕሪ ምእዋጁ፡ ን ልዕሊ 12 ሰዓታት፡ ፕረዚደንት ሮበርት ሙጋበ ኣብ መንበሪ ገዝኡ ኣብ ቀይዲ ይርከብ ኣሎ።

ኣብ ገለ ኩርናዓት ዋና ከተማ ዚምባብወ ሃራረ፡ ቶኽሲ ከምእተሰምዐ ኳ እንተተገልጸ፡ ኣብታ ጎደናታታ ብሰራዊት ዝሕሎ ዘሎ ከተማ ብሓፈሻ፡ ምድንጻው ዝዓብለሎ ጸጥታ ሰፊኑ ከምዘሎ ይሕበር።

እቲ ምንቅስቓስ ሰራዊት፡ ነቲ 93 ዓመት ገይሩ ዘሎ ሮበርት ሙጋበ መን ይተክኣዮ ተባሂሉ ኣብ መንጎ ብዓልቲ ቤቱ ግሬስ ከምኡ ድማ ምኽትሉ ዝነበረ ኢመርሰን ምናንጋግዋ ተኸሲቱ ንዝጸንሐ መሪር ክርክር ናይ ምፍትሑ ኣድላይነት ዘንቀሎ ኮይኑ ዝተዓወተሉ ከምዝመስል `ውን ማዕከናት ዜናታት ይእምቱ።

ማዕከናት ዜና ዓለም ነቲ ሰራዊት ዚምባብወ ዝወሰዶ ስጉምቲ ከም ዕልዋ መንግስቲ ይገልጹዎ ኳ እንተለዉ፡ ኣዘዝቲ ሰራዊት ዚምባብወ ግን እቲ ስጉምቲ ዕልዋ ከምዘይኮነ ኣሉታ ብምሃብ፡ ነቶም ገበነኛታት ኣብ ፍትሒ ድሕሪ ምቕራብ ኣብ ሓጺር እዋን እቲ ኩነታት ናብ ንቡር ክምለስ ምዃኑ ደጋጊሞም ይገልጹ።

ብዓልቲ ቤቱ ንሮበርት ሙጋበ ግሬስ ሎሚ ብስራሕ ብዝብል መመኽኔታ ካብታ ሃገር ወጺኣ ኣብ ጎረቤት ሃገር ናሚብያ ከምእትርከብ ዘይተረጋገጹ ጸብጻባት ይሕብሩ።

እቲ ወተሃደራዊ ስጉምቲ ሮበርት ሙጋበ ንምኽትሉ ካብ ስልጣን ድሕሪ ምስጓጉ፡ ኣዛዚ ሰራዊት `ታ ሃገር፡ ነቲ ኣብ ዛኑ-ፒፍ ተኸሲቱ ዘሎ ሕፍሽፍሽ ንምፍታሕ ስጉምቲ ክወስድ ምዃኑ ድሕሪ ምግላጹ ድሕሪ ክልተ መዓልቲ እዩ ስዒቡ።

በዚ ስጉምቲ`ዚ ኸኣ፡ እቲ ብዓልቲ ቤቱ መተካእትኡ ኮይና ስልጣን ክትጭብጥ መታን ንመቐናቕንታ ሰጒጉ ላዕለዋይ ኢድ ክምጥዋ ወጢኑ ዝነበረ ኣብ ዓለምና ዝሽምገለ መራሒ ዝኾነ ሮበርት ሙጋበ ኣብ ስልጣን ናይ ምጽናሕ ዕድሉ ሓጺር ምዃኑ ድማ ተንተንቲ ፖለቲካ ናይቲ ከባቢ ይሕብሩ ኣለዉ።

ሮበርት ሙጋበ ን 37 ዓመታት ኣብ ስልጣን ኣብ ዝጸንሓሉ እዋን፡ እታ ሃገር ብቑጠባ ኮይነ ፖለቲካዊ መሰላት ከተንቆልቊል ከምዝጸንሐት ዝፍለጥ ኮይኑ ህዝቢ ከምዚ ዝኣመሰለ ናይ ለውጢ ምንቅስቓስ ሃረር ክብል ከምዝጸንሐ ካብታ ሃገር ጸብጻባት ዘመሓላልፉ ዘለዉ ወከለቲ ማዕከናት ዜና ይሕብሩ።

Subscribe ASSENNA YouTube to get Radio Assenna shows on time: