ናብ ዝሓለፈ ቀዳም 14 ጥሪ ኣብ ዘውግሐ ለይቲ 180 ስደተኛታት ኣብ ማእከላይ ባሕሪ ጥሒሎም ከምዝሞቱ ካብቲ ሓደጋ ድሒኖም ኣብዚ እዋን ‘ዚ ኣብ ትራፓኒ ዝተባህለት ከተማ ሲሲልያ ተዓቝቦም ዝርከቡ ክልተ ኤትራውያንን ክልተ ኢትዮጵያውያንን ዜጋታት ከም ዝሓበሩ AFP ኣረጋጊጹ።

እቶም ድሒኖም ዘለዉ ሓንቲ ጓል ኣንስተይትን 3 ደቂ ተባዕትዮን ኣእምሮኦም በቲ ዘጋጠሞም ክቢድ ኩነታት ተናዊጹን ደኺሞምን ኳ እንተለዉ፣ ሰራሕተኛታት ሰብኣዊ ጉዳያት ኣህጉራዊ ውድብ ስደተኛታትን UNHCR ን ካብቶም ዝደሓኑ ስደተኛታት ዝረኸቡዎ ዘሰንብድ ዝርዝራት ናይቲ ኣብ ማያት ሊብያ ዘጋጠመ ከቢድ ሓደጋ ኣስካሕኪሑዎም ከምዘሎ እቲ ሓበሬታ የረድእ።

ብመሰረት እቲ ሓበሬታ፣ እታ ክልተ ደርቢ ዝነበራ ጃልባ ልዕሊ 180 ሰባት ጽዒና ካብ ገማግም ሊብያ ምስ ተበገሰት ድሕሪ ሓሙሽተ ሰዓታት እዩ ናይ ሞተር ጸገም ኣጋጢሙዋ ናብ ባሕሪ ክትጥሕል ጅሚራ።

እዚ ካብ AFP  ዝረኸብናዮ ዜና ነቶም ግዳያት ብሓፈሻ ካብ ምብራቕ ኣፍሪቃ ኢሉ ኳ እንተገለጾ፣ ቤተሰብ ግዳያት ግን 160 ካብቶም ጥሒሎም ዘለዉ ግዳያት ኤርትራውያን ከይኮኑ ከምዘይተርፉ ንድምጺ ኣሰና ሓቢሮም።

ሓንቲ ኣብ ዓዲ ጥልያን እትነብር ሓዋ ኣብታ ጃልባ ዝነበራ፣ እታ ጃልባ ክትጥሕል ኣብ ዝጀመረትሉ ወጋሕታ 14 ጥሪ ናይ ህይወት ኣድሕን ጻውዒት ሳተላይት ቴለፎን ካብቶም ተሳፍርቲ ዝተቐበለት ኤርትራዊት ሓብቲ ቅድሚ ሰለስተ መዓልቲ ንድምጺ ኣሰና ኣብ ዝሃበቶ ሓበሬታ፣ ነቲ ሽዑ ብቴለፎና ዝሰምዓቶ ዋጭዋጭታን ጭንቀትን ክትጻወሮ ከምዘይከኣለት ሓቢራ። ብኡንብኡ ብዛዕባ’ቲ ህጹጽ ኩነታት ንትካላት ድሕነት ዓዲ ጥልያን ከምዝሓበረት ‘ውን ኣረዲኣ። ይኹን’ምበር፣ ሃለዋት ናይቶም ግዳይት ንምርግጋጽ ምሉእ መዓልቲ ናብታ ዝተቐበለታ ሳትላይት ቴለፎን ክትድውል ከላ እታ ቴሌፎን ንዝተወሰነ እዋን ትሰርሕ ኳ እንተነበረት፣ ዝምልሰላ ሰብ ከም ዘይረኸበት ብሓዘን ገሊጻ። ምስዛ ኤርትራዊት ሓብቲ ድሕሪ ገበርናዮ ዝርረብ፣ ምስቶም ግዳያት ብቐጥታ ብምዝርራብ ነቲ ኩነታት ካብ ኣፎም ንምርካቡ ብቕንያቱ ዝተገብረ ፈተነ ዛጊት ኣይተዓወተን።

እዞም ሞይቶም ዝብሃሉ ዘለዉ ግዳያት፣ እቶም ኣብ ዝሓለፈ ቀረባ መዓልታት 100 ምዃኖም ብኣህጉራውያን ማዕከናት ዝተዘርበሎም ምዃኖም እዩ። ዛጊት ኣርባዕተ ሬሳታት ጥራይ ተረኺቡ ከምዘሎ ‘ውን ይፍለጥ።